E! ua fā‘ia le poutū malosi! Le auauna lelei e, ulufale maia i le fiafia o lou alii!
E! ua maliliu toa ua maimau ai auupega o le taua! Talofa ua lē atoa le faitau i totonu o le aiga auā ua gausia le poutu malosi sa fai ma toomaga i taimi loulouā.
O le punimatagi i taimi o afā ma puapuaga. O le po o le Aso Gafua, aso 2 o Me, faia ai sauniga faaleaiga o le susuga ia Feesago Liumalo Leaogamalie Tinoa‘i Siale Feesago, o ia o le toe ulutaia o le alalafaga o Lufilufi.
O ona sauniga paia i lea po na faia lea i le malumalu Ekalesia Katoliko i Woodridge. Sa taitaia lava e le afioga ia Patele Epati Tamati, na logo mālie i le faafofoga se faamalosiaga puupuu ma le suamalie na uluulu i finagalo i le tāua o le tapenapena o le maota ma le agaga o le tagata lava ia e faaafio ai le Alii i soo se taimi e valaau a o maua le soifua ma le ola, ne‘i oo mai le valaau a le Matai ae leai se faafuaseia.
O se tamā ua lausilafia e soo se tagata i le talaina o gafa o le aiga ma meafai a le atunuu, o se tamā foi e galue ma tauivi e tagi lava o ia i ona lima, e agamalie e pei ona molimauina le fiafia i ai o tupulaga a le nuu, auā e lē faailoga tagata foi ae tutusa tagata uma ia te ia.
O se tasi lenei o tamā e lei mamao atu lona aso soifua e 91 na auina atu foi i luga o le Samoa Times. E tusa ma le luaselau luasefululua (222) ē na tupuga mai ia Feesago.
O ona sauniga faaiu sa faataunuuina i le aso na sosoo ai, aso 3 o Me, ma o se aso na vaaia ai le osi aiga ma le tele o uo a toeaina, na faatumulia i soo se tagata e manatua galuega lelei a lenei tamā.
O le aufaipese ma le Divine Mercy a Woodridge, o le ekalesia lea a le tamā ia Feesago na tapenaina le tele o viiga o le Atua, faatasi ma nisi Divine Mercy a le matagaluega sa fai sao.
O le isi aufaipese sa auai o le AOG a Ipswich i lalo o le taitaiga a le toeaina, susuga ia Pelenato & Faapaia Laban.
O le susuga ia Tusa Toe Faa‘efili sa fai ma pule o le tausamaaga, ona alo loa lea o aiga-na-lua i faaaloaloga masani. Na tasi moemoe i le tofa ia Patea Taefu Pesamino o ia lea sa faalelefulu auā le paia i faafeagaiga ma le atunuu sa auai.
Sa matuā aafu i faaaloaloaga, laulelei ma malilie le afioga ia Patele, Toeaina ia Tauaaga Mataafa ma le paia i le aufaigaluega a le Atua sa auai ma le auvalaaulia sa molimauina le matagofie o tapenaga, ua fata luga fata lalo i le maoa‘e ma le maualuga o faaaloaloga.
Na tofusia foi le ekalesia sa fitā i tuga auā le faamoemoe ekalesia Katoliko a Woodridge, faapea le afioaga o Lufilufi na oo a i ai faaaloaloga a aiga na lua faapea le paia i le paolo i le afio o Tofaeono ma Tofaeono ma le paia i le aigaalii.
E lē gata i lea o Samoa na potopoto, le usoga a tumua a pule ua moni ai le upu ua taape le fuamanusina ua tofu le gogo ma si ana i‘a.
Maualuga foi le aso i le auai foi o le afioga ia Tauiliili Ata ma le faletua ia Elisapeta Malifa ua loa foi le tautua i le atunuu i faasalalauga.
O le tofa ia Sau‘afu sa fai ma sui o le ekalesia ma Samoa na potopoto e molimoli se faafetai, ae o le susuga ia Moefaauo Agaimalo sa tu i le tootoo o le afioaga o Lufilufi.
O le tama matua o taumafa, le fetaiga ia Poulava ma Lonra Matautia ma le Uncle Sam’s Catering na saunia le taumafataga.
O le tala moni na matuai laugatasia ma tofusia uma ē na auai i le maualuga o tapenaga a aiga-na-lua ona o pelega o le tamā ia Feesago, o se tamā ua iloga ona misia e ona aiga faapea faalapotopotoga a Samoa i Brisbane.
