O le Aso Lulu na tea nei na faamavae ai David Cameron i le tofi Palemia o Peretania, ae faatauto ai Theresa May e avea ma Palemia fou a le atunuu. O nei faiga matautia ona o le faaiuga o le Pelepesite a Peretania na taitaiina e Cameron ia nonofo pea i totonu o le lio a Europa. Peitai na faia‘ina le mau a David Cameron.
Na manumalo le Sao a i latou na mananao e alu ese Peretania mai Europa. O lea na faamavae ai loa David Cameron ile tofi Palemia, ae tofia le tamaitai o Theresa May e sui ia te ia. E lima tausaga o avea David Cameron ma Palemia ile faigamalo ale Conservative Party a Peretania. O ia ose tagata Kerisiano e tautino soo i lana talitonuga faakerisiano. E o lua lona talitonuga ma le malosi o lana mau faapolotiki e tatau pea ona auai Peretania i totonu o Europa. Ile faia‘ina la o lea mau ile palota o le masina na tea nei, o lea ua faamavae ai o ia ae taitaia le malo ese tasi na lagolagoina le oese mai Europa.
Peitai, o le Palemia fou, Theresa May, o ia foi na lagolagoina le tumau ai pea o Peretania i totonu o le Iuni a Europa. E foliga e leai se faigata o lea mau ma le mea ua iai nei le malo ile see ese mai le Iuni a Europa. Na ta‘ua e Theresa May e leai se faigata o lea tulaga i lalo o lana vaaiga, auā e mafai e ia ona faatonutonu le vaa o le atunuu a‘o folau ese ma Europa.
O Theresa May o le Palemia tamaitai muamua lea a le atunuu talu ai Margaret Thatcher, lea sa avea ma Palemia o le atunuu mo le sefulutasi tausaga, 1979-1990.
