O loo talatala mai e Paulo i nei fuaiupu le mataupu o le toetutu o ē ua oti. O se tusitusiga tāua tele, sa faamalamalama ai e le aposetolo le mataupu lea, ona ua fesiligia e le ekalesia ona o a‘oa‘oga sese ua ofi atu i totonu o le Ekalesia.
Ae toe faaopoopo atu le aposetolo i fuaiupu e 51 ma le 52 “Faauta mai, ou te ta‘u atu ia te outou le mea lilo; e le momoe i tatou uma, a e liua i tatou uma, e faafuasei lava, o le emo o le mata, pe a ilia le pu faauma; aua e ilia lava, e toe tutu mai ai e ua oti ma le ola pea, e liua foi i tatou.”
O upu nei e matuā loloto se feau o loo momoli mai ai, ma e tatau ona manatunatu i ai i tatou e uiga i le tāua o le mataupu o le toetu.
Auā foi o le Eseta ma le toetu, ua suia ai le taaviliga o le natura o mea, ma suia ai le faamoemoe oti i le faamoemoe soifua. Tatou matamata pea i suiga sa fai e le Eseta.
Sui e le Eseta le Satauro ma le Tuugamau
A o lei toe soifua mai Iesu, o le satauro sa na o se mea sa faaaogā e faaoo ai ni faasalaga.
Ona o le matuia o le oti o le tagata i lea faasalaga, sa faasā ai e le malo o Roma ona toe faaoo se sala i ona tagatānuu e ala i le faasatauro, vaganā ua iai ni solitulafono matuia poo nisi e faasagatau i lana puleaga.
Ae ona o le Eseta, ua avea ai le satauro matagā ma le lē amanaia e fai ma mea tāua i le talitonuga o le au kerisiano.
Lea ua tele ina avea ai le satauro e faatutu solo i faletapuai, a o nisi foi ua fai ai asoa, e faamanatu ai le alofa silisili ese o le Atua ma le faamoemoe manuia ua i totonu o le tagata faatuatua.
E faapena le tuugamau, sa fai ma mea taufaafefe i tagata, ma le manatu o le iuga lea o mea uma. O le tapunia o le tuugamau, o le mutaaga foi lea o le faamoemoe.
Ae ona o le Eseta ma le toetu mai o Iesu Keriso, ua fai ai le tuugamau ma oliolisaga o le tagata, ina ua mautinoa, i tua atu o le tuugamau o loo iai le ola ua saunia e le Atua mo lana fanau.
O le naunautaiga lava o le tagata, ia manuia ma ia maua oloa o le lalolagi nei, ae a manatu loa i le oti, ona faatauvaa lea o le naunau i mea o le tino, auā o le ā le aogā pe a faatusatusa i le manuia atalī o loo faatalitali mai?
Sui e le Eseta le Taimi
I totonu lava o le Tusi Paia o loo ta‘u mai ai o le ola e puupuu ma saasaa. E faatusa foi le soifuaga nei e pei o le puao e aliali mai ma toe mou.
O le tele foi o taimi tatou te maofa i le vave o le alu o le tausaga. Ae ina ua iai le Eseta ma le toetu mai o Iesu, ua suia atoa ai ma le tatou talitonuga e uiga i le taimi. Auā foi o lea ua iai le taimi e faavavau.
Sui e le Eseta le Ola
A maitauina le mau vevesi o tutupu i itu e fā o le lalolagi, ona iloa ai lea o le ola soonafai ma le leai o se faamoemoe i le tele o tagata.
O vevesi ma faalavelave, ua faamata‘u ai le soifua taumafai o le toatele ma manatu ai; o le ā ea le uiga o lenei ola? Ua lē mapu le fetaua‘i o malo, e oo lava i atunuu, ua toe fetaua‘i ona tagata, ae lē faitaulia le mau faama‘i eseese o loo tau saili ni ona togafitiga.
Ae afai e aunoa ma le alii o le toetu, e goto lo tatou sa. Poo ā mea e tutupu, e iai pea lou faamoemoe ona o le Alii o le toetu ua fetalai mai, ‘Ua ou sau ina ia outou maua le ola, ma maua atili ai lava.’ O lona uiga, ua iai le avanoa e te soifua fiafia ai i totonu o faigata, ona o lona fesoasoani mai.
Sui e le Eseta le Oti
Ae lei iai se toetu, o le oti o le fili numera tasi lea o le tagata. O le iuga lea sa fai ma popolega o le toatele, auā o le ala, e leai se toe foi mai. Ae ona o le Eseta ma le toetu, ua tatou iloa ai, e iai le tagata sa maliu ma toe soifua mai. O Iesu.
A maliu sē pele ia tatou, tatou te faanoanoa, ae o se faanoanoa i se taimi itiiti, auā ua mautinoa e toe fevaaia‘i.
Auā o le maliu o Iesu ua magalo ai a tatou agasala e tele, ma lona toetu ua maua ai e i tatou lea lava faamoemoe e tasi.
Ua suia ai le oti e fai ma manuia, auā o le faitotoa lea e ulufale atu ai i le ola e faavavau ua saunia e le Atua mo lana fanau.
Ae i le tusi a le aposetolo o Paulo ia Korinito na ia faapea ai, “Ua faaumatia le oti e faavavau … Le oti e, o fea o iai lou tui, le tuugamau e, o fea o iai lou manumalo?”
O mea uma i lalo o le la, e faatauvaa. O le tala lea a le Failauga. E tatau ai ona filifili Iesu e fai ma faaola, ina ia aua ne‘i pa‘ulia lo tatou sa i futia o le olaga nei, ae soifua i totonu o faafitauli ma le faamoemoe ola i tua atu o le tuugamau. A aunoa ma lea, fai mai le Tusi Paia e sili lo tatou malaia.
