E lē fou le vaega tupe o loo tuuina i totonu o tala autū o le Tupe mo galuega a le Malo i tausaga taitasi, mo vaega faaupufai poo political parties. O le taimi a o avea le tamaaiga ma taitai o le Itu agai ma le vaega faaupufai o le SNDP a o avea le afioga Tofilau Eti Alesana ma Palemia ae minisita o tupe le susuga Tuilaepa L Sailele Malielegaoi, sa uluai fuafuaina ai vaega tupe mo galuega tau atina’e a vaega faaupufai.
E $100,000 le vaega tupe na amata ai ae o lea ua faalua ma faaopoopo le isi selau afe ma maua ai le $200,000 i le tausaga. O le paeaiga ua mavae a le Palemene sa na o le HRPP le vaega faaupufai na aloaia i le Palemene ina ua malepe ma salalau tasi le SDUP ae faato’ā tau amata le nofoaiga faapalemene i lea vaitau.
O le paeaiga a le Palemene na filifilia i le palota tele o le tausaga e 2001 na soloia foi le Itu agai sa iai le pati a le SNDP ma tasi ai foi le vaega faaupufai na aloaia i le Palemene i lea vaitaimi.
O le paeaiga ua iai nei a le Palemene ua lua pati faaupufai ma ua aloaia foi le iai o se Itu agai. O le mafuaaga lea o le finau mai o le Tautua Samoa e vaelua tutusa le $200 afe ua fuafua mo vaega faaupufai i lenei tausaga faaletupe ua amatalia. O le latou mau e fia faatau se fanua ma fau so latou ofisa tutotonu.
O lo latou ofisa sa i le maota o le Ioane Viliamu ua lē toe faagaioia ona ua lē mafai ona totogi le lisi. Ua siitia atu nei a latou galuega faapati i se tasi o maota o le aiga o le faipule o Salega le afioga Afualo Dr Woods Salele i Matautu i Apia.
Faaalia e se tasi o faipule o le Itu agai o le mafuaaga lea o le naunau e fia maua le ‘afa o lea seleni ina ia fausia ai so latou lava ofisa tutotonu.
O le saunoaga a le alii Palemia e tali ai i lea fanoga, e toatele atu sui faipule o le HRPP nai lo le Tautua Samoa, ma o le vaevaeina o le tupe e tatau ona fua i le aofaiga o faipule o loo i le faafaletui a le HRPP ma le Tautua Samoa. O lona uiga, afai e 37 nofoa e umia e le HRPP e tatau ona tele lana tufaaga e maua i lea vaegatupe, ae a 12 faipule a le Itu agai e laitiiti foi lana tufaaga e maua.
E lē o talia lelei e faipule o le Tautua Samoa lea faasoa a le taitai o le Malo ona o lo latou manatu ua leva tausaga o faatu le HRPP ma ua malosi, ae o le latou vaega faaupufai e fou, e manaomia tele le faaleleia o lona atina’e.
O tausaga taitasi e maua ai e vaega faaupufai lea vaegatupe ma ua faaalia e le faipule o le Tautua Samoa le afioga Afualo, e tatau ona tuuina atu i le Palemene faamatalaga uma o le faaaogāina o ia seleni e pati faaupufai, ona o seleni e sau mai le afu maligi o le atunuu ia latou lafoga totogi.
O le fia faatuina o se ofisa fou ma faatau se fanua o le Tautua Samoa, ua saunoa le Palemia i luga o le televise, o le fanua o loo iai lo latou ofisa autu o loo lisi mai le Malo. O lo latou fale ua avea ma nofoaga tutotonu na faatupe i se nonogatupe a le HRPP ma sa togitogi foi.
E manatu le Palemia ma le taitai o le HRPP o le mea foi lea e tatau ona fai e le Tautua Samoa, o le lisi o se fanua o le Malo ma agai e fai se nonogatupe e fau ai so latou maota e avea ma ofisa tutotonu.
