Ua alu le vaiaso ua tea ma ona tua atu o faasagasaaga faagaulemalie a le Taitai o le Malo, le Afioga i le Alii Palemia, Susuga Tuilaepa Lupesoliai Sailele Malielegaoi, e faatatau i le lē agai sa‘o o Leoleo e faatino o latou tiute.
O le tutuliga ese o faatau oloa feoai mai i luma o poltito o faleoloa i le taulaga, lea na laga ai loa feteenaiga nei.
Ua toatele i latou e faatau a latou oloa ua agai i ofisa faasalalau faapea ai nusipepa e faaleo ai lo latou lē fiafia tele i lenei faiga.
Ua lē gata la ina tutuli ese mai i luma o faleoloa ae o lea foi ua faamalosia le laisene e $50 e tatau ona totogi i Leoleo ona faatoa faataga lea ona feoai solo nei faatau oloa.
O le faamatalaga a le Alii Palemia, e lē o se galuega lea a le Matagaluega a Leoleo, o le galuega lea e tatau ona ave i vaega o le Malo o loo totogi i ai tupe.
O le “faomea” le gaioiga a leoleo lea e fai, o se manatu faaalia lea o le Alii Palemia. Ta‘ua e Tuilaepa L. Sailele, e tele isi faafitauli e tatau ona agai leoleo e vaai ma suesue ae lē o le omai fua e tutuli ese tagata ma taumafai e ao tupe mai tagata.
O le faamatalaga a le Tautua Samoa, e lē te‘ite‘i agai leoleo e faatino nei galuega se‘i vaganā lava ua avatu i ai le faatonuga, ae o le soona lafo e le alii Palemia o nei faamatalaga e faatatau i Leoleo, e lagona ai le faanoanoa.
Ta‘ua e Palusalue Faapo II, ua pasia le tulafono ae ona pau le fautuaga ua fia tuu atu i le Malo o le toe teuteu o le tulafono manū o loo fou lava i le taimi lenei, ae tatau ona faamautu lelei laisene ma le nofoaga e totogi i ai laisene o i latou o loo faamoemoe i lenei alagatupe mo aiga, o le faatau o oloa i totonu o le taulaga. E faigata foi le galuega a Malu o le Malo, o le saunoaga lea a le Tautua Samoa.
O loo tālia uma e nei tagata le taimi e tatala ai le nofoaga o le Maketi i Fugalei, ona faatoa mafai lea ona faasoa i ai le toatele o loo feoai solo pea.
O le mau a le toatele o nei faatau oloa e leai se aiā a leoleo e taumafai ai e taofi i latou, o lea ua saunoa faalauiloa le Alii Palemia, e leai ma se mafuaaga e tutuli ese ai fua tagata ae o le faatonuga o lea ua manino le Samoa Times, na sau sa‘o lava i le vaega o Pulega o Tagata Tafafao Maimoa mai Fafo, ona o lea na oo atu ni faitioga mai nisi o le atunuu faapea tagata asiasi mai, i le faalavelave o le toatele o nei faatau oloa i feoaiga masani a le atunuu.
