O le soona lafo o faamatalaga e aofia ai le lau o le puaaelo o nisi o le afioaga o Satapuala, ua manatu le alii faipule o le Itu agai, le Tautua Samoa, le Afioga Levaopolo Talatonu, o lafoga nei ua valaauina ai e le Alii Faipule e pei foi ona laga e lana Vaega Faaupufai i le lua vaiaso talu ai, le tatau lava ona molia le Alii Palemia, Susuga Tuilaepa Lupesoliai Sailele Malielegaoi i le soli o tulafono tumau o le Palemene.
Faaalia e Levaopolo o le komiti faapalemene o loo nafa ma le iloiloa o amio a sui a faipule ma a latou gaoioiga e faatino a o avea ai ma tofi o le Maota Fono Faitulafono le ituaiga folasaga lea ua fai e le alii Palemia.
O upu nei na laga ai foi e le Taitai o le Itu Agai, Palusalue Faapo II le manatu lava lea e tatau ona ave le mataupu lenei i le Palemene.
Faaalia e Levaopolo o le a unai le mataupu lenei i le isi fono tele a le Faafaletui a le Tautua Samoa ina ia avea ma mataupu e laga i le Palemene i le isi taimi e tauaofia ai le Maota Fono o Samoa.
“O loo manino lava Tulafono Tumau,” o se faaaliga lea a Levaopolo. O le vaega e 14 o le Tulafono Tumau i le fuaiupu e 3 o loo faamamafa ai le tatau i sui faipule uma ona ave le faaaloalo i tagata uma. O loo ta‘ua ai, “… o sui uma e tatau ona faaali atu i isi sui a faipule, tagata lautele ma i latou e taualoa le faaaloalo, le faamaoni ma faiga e tutusa ai tagata uma ma e tatau ona faaali uiga talafeagai i taimi uma”.
Faaalia e Levaopolo o le lafoga a le alii Palemia ua lau ai le puaaelo o Satapuala, o ni uiga lē taualoa ma le faaaloalo. Faaalia e le alii faipule o le a faapea ona agai i le Faafaletui a le Tautua Samoa ina ia faatū se lafo ma ia tusitusia lea lafo e momoli i le Komiti faapalemene mo moliaga faasaga i le alii Palemia.
I se faatalatalanoaga o le alii Palemia i lafoga na ia faia na ia ta‘ua ai o le taitai e sa‘o ma e tatau ona faamanino le lagona i le taimi e tulai mai ai faafitauli faapea. O le foi mai i Niu Sila o le Alii Palemia na aofia ai lana taavale i le poloka tele lea na vaaia i le vaveao lea na taunuu mai ai ma maua ai le mafuaaga o le tutū o taavale ona o loo asiasi uma e taulelea ua ufi mata i sikafu ae o loo umia agaese ma laau malosi. Faaalia e le Alii Palemia o le faasusulu o moli uila i totonu o taavale ma taumafai e sailiili poo ai o malaga i ia taavale e lē o ni vaaiga ia e tatau ona molimauina i Samoa ma o ni uiga “fufu‘a” ma “faapuaaelo”.
Na maua le toe solomuli o le taavale a le alii Palemia ma ui ane i Falelatai a o faasolo lava asiasiga a taulelea Satapuala na faia lenei gaioiga, lea na iu ai lava ina agai ane leoleo ma masini sua ese le pa maa na fatufatu i luga o le auala a le Malo ae tutuli i tua taulelea ma matai na aofia ai i lea taofiga.
Na fesiligia leoleo i le fono mulimuli nei ma tusitala ae ta‘ua ai e lei molia lava nisi i ia faiga ae o loo tālia se lafo o le alii Palemia na faaalia i totonu o le Palemene ina ia agai Leoleo ma le Ofisa o le Loia Sili e molia i latou na faia lenei faiga faatagata fouvale aemaise o le faipule o le Itumalo o Aana Alofi Numera 3 o ia foi o le matai Satapuala Toesulusulu Cedric Schuster lea ua tuuaia e le taitai o le Malo i le iai i taupulepulega nei ma faatupu ai vevesi i lea itu o le atunuu.
O lafoga na ia faia na manino ai le toatamai o le Alii Palemia i le tulai mai ai o ia ituaiga vaaiga i le lua vaiaso talu ai.
