Ua pa‘e le saito ae toaitiiti le aufaigaluega

Na fulifao vaa o mala ae a‘e manū ma mamalu le aso na taupoina e pei ona potopoto ai Ekalesia e 5 a le AOG Samoa i Kuiniselani i le Aso Sa ua tuanai atu nei, aso 27 o Mati.

Talu ai ona ua tuua e le susuga i le faafeagaiga ia Tafeamaalii ma le faletua ia Apulu Lesina Le’uo le aulotu ae malaga atu mo Sini, o lea ua tasi ai le faafitiga o ‘aleaga i le vasega a taitai ma faafeagaiga, ua tatau ona iai se taitai e tausia le ekalesia AOG Samoa i le pitonuu o Carole Park.

I le iloiloga la mae‘ae‘a na tonu ai ma mautinoa le filifilia lea o le failauga o le tala lelei, le  susuga ia Sini Tauti (Mulifanua) & faletua ia Sauao Folitau e avea ma faifeau e tausia le aulotu.

O lea faamoemoe tāua na talimalo ai le matagaluega AOG Samoa i Kuiniselani i le susuga ia Ps Lanu Polutele (Taitai o le Ekalesia i Ausetalia e alaala i Sydney) o ia foi na faapaiaina le susuga i le failauga ia Sini ma le faletua ia Sauao Tauti.

O le susuga ia Ps Apouani Unasa o le taitai o le Ekalesia e alaala i Melepone sa avea ma taitai o le sauniga e fai sao i lea  sauniga tāua. Ua lē gata i lea, ae sa valaaulia faapitoa foi e le taitai le susuga ia Tafeamaalili ma le faletua ia Apulu Lesina Le’uo latou te malaga mai auā o i laua sa ia tausia le aulotu i Carole Park.

O le teuoloa a le Matagaluega le susuga ia Ps Faitoaga Soloi e alaala i Sydney, o ia sa fai ma fofoga o le lagi na te saunia se upu faalaeiau e faamalosia ai le failauga ma le faletua ina ia lototetele i le Alii ma lana galuega.

O le komiti a le AOG Samoa i Ausetalia

O le susuga ia PS Lanu Polutele taitai o le ekalesia AOG Samoa  poo le faapotopotoga a le Atua i Ausetalia e alaala i Sydney. Failautusi Ps Taeauga Ropati Frost (Qld).

Teutupe – Faitoaga Soloi (Syd). Toeaina o le Matagaluega – Ps Lega Ropati Frost (Qld). Sui Taitai – Ps Apouani Unasa (Melb), Taitai o le sauniga.

Manuia tele le galuega Sini ma Sauao Tauti e pei ona valaauina ai oulua,faamanuiaga mai o oulua aiga faapea le Ekalesia AOG Samoa i Ausetalia.