“Na maua e nisi o Saleapaga le taga pepa cocaine i luga o se papa”…leoleo
E tusa ma le 5 kalama le mamafa o le pauta faasāina o le kokeni (cocaine) na maua i se taga pepa o loo taatia i luga o se papa i gataifale o le nuu o Saleapaga i le tausaga e 2006.
Talu mai lea tausaga sa faia suesuega a leoleo poo ai e ana le pauta faasaina ao ai foi na ia faaulufale mai i Samoa. Faaalia e le alii leoleo o loo umia le tulaga o se suparenetene e vaaia le vaega suesue, le CID i le matagaluega o leoleo ma falepuipui, le tofa Ulugia Mata‘u Matafeo, e lei manuia suesuega a leoleo ma e oo mai lava i le taimi nei e lē o iloa poo ai e ana lea taga pepa.
O le Aso Faraile ua mavae, 27 o Iulai 2012, na susunu ma faatamaia ai e leoleo lea taga pepa o le kokeni faatasi ai ma isi laau faasāina o le maruana na maua i suesuega a leoleo.
Tusa ua ono tausaga o taatia le pauta faasāina i le ofisa suesue o leoleo mo sailiiliga, ae ua siliga le maua o se tasi poo nisi, o le mafuaaga lea ua faatamaia ai. Faaalia e le tofa Ulugia Mata‘u, e silia i le ‘afa miliona ($500,000) poo le sili atu foi le tau atoa o ia laau faasāina ma le pauta o le kokeni pe a faapea e faatau atu.
O le faatamaia o ia vaega na maua i galuega a leoleo, na faatamaia ai foi ma le tele o isi oloa na maua i suesuega e pei o meatotino sa gaoia ae ua mae‘a faamasinoga o i latou sa molia ai ma ua faasalaina e le faamasinoga. E faapena foi faamasinoga o i latou sa molia ona o le totō ma le umia o laau faasāina o le maruana.
O isi vaega na faatamaia o ata tifaga i DVD ma CD pese sa toe tapue faagaoi e nisi ma faatau atu. O nisi o ia DVD o ni ata e lē faatagaina ona faaulufale i Samoa.
O le saunoaga a le alii leoleo o loo faauluulu i le ofisa suesue o le tele o ia meatotino sa gaoia, ae peitai e lē o mafai ona faailoa e le alii leoleo suparenetene pe aisea na lē toe faafoi ai ia meatotino na te lei faailoa poo ā tonu, ia i latou e ana.
O le faiga faavae fou ua faataoto a le matagaluega, e ono masina e teu ai ni meatotino e maua ia latou suesuega i solitulafono eseese, ona faato‘ā faatamaia lea. O le faiga tuai sa iai e ta‘i tausaga poo le sili atu foi o teu e leoleo ni meatotino, ona faato‘ā faia lea i ai o se gaioiga faapea.
