O loo tuu fesilisili le toatele o alii ma tamaitai o le Malu o le Malo pe aisea ua toso umi ai le suesuega o le faauluuluga poo le Komesina o le matagaluega ma se tasi o Komesina lagolago.
E iai le talitonuga o nisi e iai lava se isi mafuaaga ua savalia ai nei le ono masina o loo faataamilomilo pea le mataupu e ui o lea ua tauaao e le Kapeneta le lipoti a le komisi suesue, e ese mai le isi vaega faaopoopo ua toe faaauau ai le suesuega mo le isi fā vaiaso lea ua mae‘a ae o loo tatali pea le matagaluega i se taunuuga o le Komesina ma lana lagolago pe toe foi atu pe leai.
Sa faia se sailiiliga i le vaiaso ua mavae i le fia iloa pe ua mae‘a le fā vaiaso na faaopoopo lea sa silasila ai le komisi suesue pe iai ni aafiaga o le Komesina ma lana lagolago i lalo o le Tulafono faaleoleo le Police Act.
Na maua se faamatalaga mai se molimau e latalata i le suesuega na faailoa mai ai, o le fā vaiaso lea na faailoa e le Palemia i le masina ua mavae e toe faaauau ai le suesuega na faatoa amata i le aso 26 o le masina na tea nei o Me.
O lona uiga e faatoa mae‘a le fā vaiaso faaopoopo i le aso 25 o le masina nei o Iuni ona iloa ai lea o se taunuuga pe iai pe leai ni aafiaga o le Komesina le afioga Lilomaiava Fou Taioalo ma lana Komesina lagolago le afioga Sala Seaga Uili Lafaele.
E lei manuia sailiga i se finagalo o le minisita o le matagaluega o leoleo ma falepuipui le afioga Sala Fata Pinati e tusa o le mataupu lenei. E oo foi i le Palemia e lei manuia foi se sailiga mo sona finagalo.
E tele tala salatua i le suesuega ma tuua‘iga na faavae ai le komisi ona e manatu nisi afai o le suesuega ua mae‘a lea ua iai le lipoti ua ave i le Kapeneta o loo iai ni aafiaga o alii leoleo sinia o loo faamalolo lē tumau, ua tatau ona faia loa se faaiuga a le Kapeneta e fua i ni fautuaga ua tuuina atu i le lipoti a le komisi suesue.
E lei faalauiloaina lava lea lipoti mo le silafia e le atunuu ae ua na ona faamatogi mai e le Palemia o fautuaga faasino i itu lelei e faaleleia ai le tiute o leoleo. O le isi fesili o loo laualuga i lagona o nisi o leoleo sinia, pe aisea ua ese ai le faatinoga o le suesueina o le komesina o iai nei, ma le komesina sa agai foi i ai se suesuega a se komisi ona o ona aafiaga i laau malosi na aumai e le vaaleoleo o le Nafanua mai Amerika Samoa.
O le fautuaga a le komisi suesue lea na fautuaina ai le faia o ni moliaga faasolitulafono peitai ina ua taulimaina e le Kapeneta, e lei apoina le fautuaga a le komisi suesue ae na faamuta ma lē toe filifilia lē sa avea ma komesina ina ua mae‘a lana konekarate e tolu tausaga.
