Ua fetaiai tapenaga o le palota tele a le sui faipule o Palauli i Sasa‘e ma se moliaga faasolitulafono ua faaalia e leoleo o le gaoi.
O se moliaga e mafua mai i le mataupu i le faatauina o le fanua o le tina o Theresa Stowers, lea na suesueina muamua i le faamasinoga sivil*i poo le civil court. Sa faamaonia i lea faamasinoga o le fanua o lea tina na faatauina e Toluono i se auala faaalatua (fraud).
O le fanua ina ua i lalo o le suafa o le faipule sa faamau ai sana nonogatupe i se tasi o faletupe i Samoa.
O le malaga mai o le aiga e ana le fanua ma saili atu i le ofisa o le lesitala o fanua mo le fia faaaogāina loa o le eleele mo se atiina‘e a le aiga, ae maua ane ai ua i lalo o le suafa o Toluono Feti le fanua.
O i na faia ai loa suesuega a le aiga ma iu ina sulufa’i ai i le faamasinog. Na faia le faaiuga a le faamasinoga e toe ave le fanua o Theresa Stowers ae ia saili muamua se aseta e faamau a’i le nonogatupe.
Faaalia e le Komesina Lagolago le afioga Leaupepe Fatu Pula, o le faavae lea o le tagi a le aiga i leoleo ua tuuaia ai Toluono i lona faia o se auala solitulafono na ia maua ai le fanua, lea ua molia ai nei i le moliaga e tasi o le gaoi.
Na faaalia e Leaupepe a faamaonia le moliaga o le faipule o Palauli i Sasa‘e e mafai ona faasalaina i le falepuipui i le 5 tausaga e fua i le tau o le meatotino (fanua) na aafia i le gaioiga solitulafono ua tuuaia ai.
O le Faamasinoga Faaitumalo o le a fofogaina ai lenei mataupu, ae ua mautinoa o se taimi o le tausaga fou. O le aso 6 o Tesema e pei ona faailoa mai e le komesina lagolago na valaauina ai mo le taimi muamua le moliaga o Toluono Feti.
O le mae‘a ona fofogaina o le faaiuga i le tagi a le aiga o Theresa Stowers i lo latou fanua, na alia‘e mai ai se isi mataupu lava tau fanua e aafia ai foi lē ua molia nei. Faaalia e le sui sooupu o le Matagaluega o Leoleo ma Falepuipui, e iai nisi moliaga e faaono toe faaopoopo i le moliaga e tasi o le gaoi ua molia ai le sui faipule tutoatasi o le Palemene, sa avea ma Pule o le Faalapotopotoga o le Malosi Faaeletise le EPC, a o lei filifilia e lona itumalo e tauaveina le tofi i le palota o le tausaga e 2006.
