I totonu o aso lima na folasia ai i luma o Samoa atoa e ala i faasalalauga ma lomiga o nusipepa se feeseeseaiga i le va o le Komiti Faafoe poo le Fono a Faatonu a le Koluse Mumu ma le Pulega ma sui o le faalapotopotoga.
O le Aso Tofi na faalauiloa ai atugaluga o le Pulega e ala i le tamaitai Ofisa Sili o Namulauulu Tauala Mauala i le tulaga o iai le fiu e faatali se faamaoniga a le Fono o Faatonu a le Koluse Mumu ina ia mafai ai ona aumai le iva miliona tala ua faataatia mai e le Koluse Mumu Faavaomalo mo galuega toe faalelei o le sunami ma o se tupe mo le toe faaleleia o nofoaga ma fesoasoani fia faia faaauau i aiga faapea nofoaga na faaleagaina ona o lea faalavelave faalenatura.
Faaalia e Namulauulu o le aso 31 o le masina nei o Aukuso e faagata ai le oo atu o se talosaga aloaia mai i Samoa mo lea seleni ma o lea talosaga aloaia e moomia ai le faamaoniga mai i le Fono a Faatonu a le faalapotopotoga lenei i Samoa.
O le Aso Faraile na faatino ai loa se fono faapitoa a le Faalapotopotoga o le Koluse Mumu ma faia ai loa le faaiuga i le tusa o le ‘afa o le fa (4.30pm) ina ia sui le Fono fuai a Faatonu o le Koluse Mumu ae tofia se Fono lē tumau a Faatonu mo le faaauauina o galuega fia vave faatino a le faalapotopotoga.
O le fonotaga foi lea na suia ai ma le Peresitene lea na tofia ai mo se taimi lē tumau le afioga Faleao Maka Sapolu, o se tasi ua tele tausaga o galue ma avea foi ma Ofisa Sili o le Faalapotopotoga o le Koluse Mumu.
O le afiafi foi lea na faaalia ai e le Peresitene lē tumau a le Koluse Mumu, Faleao Maka Sapolu, o loo iai nisi o mataupu e pei o lipoti o galuega faatino ma tupe faaalu a le Faalapotopotoga lenei o loo moomia le fono ai ma faamanino.
O le Aso Toonai sa iai le aufaigaluega i le nofoaga tutotonu o le Koluse Mumu. O le Aso Sa na taunuu atu ai loa sui tuai o le Fono a Faatonu a le Faalapotopotoga ma poloka le auala e agai ai i totonu o le ofisa tutotonu tagata e afea lea galuega.
Na faapea foi ona iai ma leoleo i lea lava nofoaga e tau saili se filemu o lea feeseeseaiga.
O le Aso Gafua na faalauiloa ai e le Peresitene na faatulai ese, Muagututagata Peter Ah Him o ia lea ua avea ma Ofisa Sili lē tumau o le Koluse Mumu ma o le fono lea na faia ma aveese ai le Fono a Faufautua tuai, e lē aloaia ona sa iai se poloaiga lē tumau a le Faamasinoga e taofi ai le fono faapitoa lea. O le mau a le Peresitene lē tumau – e lei oo atu ia te ia se poloaiga faapea.
O le Aso Gafua lava lea na faaali ai foi i lipoti ua faatulai ese ai e le Fono tuai a Faufautua le tamaitai Ofisa Sili o le Faalapotopotoga o le Koluse Mumu. Ua faatonu ai foi e le Peresitene na faatulai ese, Muagututagata Peter Ah Him lea ua tofia e le Fono tuai a Faufautua e avea ma Ofisa Sili lē Tumau, le aufaigaluega a le Koluse Mumu e foi atu e faigaluega pe o le a tutuli ese loa mai ia latou galuega.
O le Aso Gafua lava lea sosoo ai ma le Aso Lua na feiloai ai loa le Alii Palemia ma itu uma e lua. Sa feiloai i le Aso Faraile na tulai mai ai le fono faapitoa, ae e lei manino se talanoaga.
O le Aso Lua la lea na toe feiloai ai loa ma na ta‘ua e le sui o le Fono tuai a Faufautua o Vaasiliifiti Moelagi Jackson, na o latou tāpā ai se fesoasoani a le taitai o le Malo, o ia foi o le Minisita o Faalapotopotoga Tumaoti i totonu o Samoa ona ua faatetele ane lava feeseeseaiga ma ua faalauiloa uma i luga o ofisa faasalalau ma nusipepa.
O lea fonotaga na mae‘a loa i le Aso Lua valaau loa e itu e lua sui tusitala o Samoa ma faalauiloa mai ai ua mae‘a soalaupule eseesega a itu e lua ma o lea ua toe omai faatasi e galulue mo le faaleleia atili o le tautua a le Koluse Mumu ae faatuatuanai fatia ua alu ma feeseeseaiga na tulai mai ai. Ua toe tulai mai nei la le Fono tuai a Faatonu i lona tulaga sa iai ae o le afioga Faleao Maka Sapolu ua avea nei ma lagolago i le Peresitene le afioga Muagututagata Peter Ah Him.
Ua toe foi ane le tamaitai Ofisa Sili, le Afioga Namulauulu Tautala Mauala ma le aufaigaluega ma ua galulue faatasi nei i lalo o le fautuaga a le Alii Palemia e faamautu le talosaga ina ia vave ona ave i totonu ma faamaonia ai loa le moomia o le 9 miliona tala e le Koluse Mumu auā galuega toe faaleleia aemaise o le fesoasoani mo aiga ma afioaga na aafia ona o le tsunami.
“O le mea tāua lava o lea ua toe lelei matou, ma ua o matou omai e galulue faatasi auā le lelei o le faalapotopotoga,” o se faamatalaga lea a Faleao Maka Sapolu. “Ae o le a iai se taimi e toe vaavaai lelei ai i isi mataupu i le lotoifale lava ia o le Koluse Mumu”.
O lea faamatalaga na tali mai ai Faleao i le fesiligia e Tusitala poo le toe faaleleia o le va o nei tino e lua o le Koluse Mumu o le a faagalo ai loa ma tuuaiga i le masalomia ai o le Peresitene ma le Fono Tuai a Faufautua i nisi o lipoti e tatau ona folasia ma faamalamalama ai tulaga o seleni faaalu a le faalapotopotoga.
O le tali a le Peresitene o Muagututagata o le a taatia uma ese mataupu na lāgā i lenei feeseeseaiga ae o le a taulai i le agai i luma le faalapotopotoga.
O le tali la a isi sui o le Koluse Mumu, o le a amata lemu, faatea le talosaga e pei ona lagalagā ai lenei feeseeseaiga ona vaavaai loa lea i le faamautu ma le faaleleia o fesootaiga i le va o sui, faamautu ai ma suiga ua tatau ona iai le Faavae o le Koluse Mumu ma talanoaina loa mataupu nei na lagalaga e sui o le Faalapotopotoga.
Na faafetaia e ia tino e lua le sao o le Alii Palemia i le tau foia ai o lenei faafitauli.
“O ana upu amata i le matou feiloaiga na ia faamamafa ai le tāua o le pulea o le loto, le tāua o le manino o fesootaiga aemaise o le saili o le manuia o tagata Samoa e le Koluse Mumu ae lē o le tau fai agai lava o le itu latou e saili le sa‘o e aunoa ma se tuualalo,” o le saunoaga faafetai lea a le sui o le Koluse Mumu, Vaasiliifiti Moelagi Jackson.
