E amata tusi lenei tusitusiga faato‘ā mae‘a mai le fonotaga a le vaega faaupufai a le Leipa i Manurewa i le po o le Aso Sa. O lea fonotaga sa faia faapitoa lava mo le sailiga o se tagata e toatasi e avea ma sui o le Leipa i le faigapalota o le tausaga 2011.
E toafitu i latou sa tauva mo lea tofiga. E toalua tagata Maori, toalua tagata Initia, tasi le alii papalagi, tasi le tamaitai Toga, ma le alo o Samoa, le susuga ia Jerome Mika.
Na amata vevesi lava le amataga o le fonotaga ina ua finau malosi Maori e tatau ona iai se tagata Maori i totonu o le komiti e faia le filifiliga. Ona faia lea o le finau ma avatu i ai se lagona, afai e iai se tagata Maori ua tatau foi ona iai se tagata Pasefika.
O le naunautaiga lava a Maori ina ia tulai mai se tagata Maori e fai ma tofi o Manurewa. Sa iai lo‘u talitonuga o loo iai itumalo faapitoa a Maori, a o tagata Pasefika, e pau lea o le avanoa e mafai ona ofi atu ai i le Palemene o Niu Sila.
Sa tuu le avanoa i soo se sui o le Leipa, poo se sui foi o le iuni a le EPMU ma le Service Food Workers o loo afifio i Manurewa lava, e palota poo ai e ave i ai le latou faatuatuaga. Sa ou maitauina e o atu pogisa lava isi tagata Samoa i lenei fonotaga. Na o atu e lagolago sui a Maori, ae galo o loo iai se alo o Samoa o loo finau mo le tofi.
Ina ua mae‘a le faaiuga a le Komiti sa iloiloina lea mataupu ma faailoa mai, ua tasi le Komiti, ma i latou o loo afifio i Manurewa o le a avea le tamaitai Maori o Louisa Wall e fai ma sui a le Leipa i le faigapalota o le tausaga 2011, i le itumalo o Manurewa.
E lagona ai le faanoanoa ona ua malolo se tasi o alo o Samoa, ma ua misia ai e tagata Pasefika le avanoa e fai ma faipule o Manurewa. E momoli atu le faafetai i le mamalu o le tatou Atunuu sa matou faatasi ma tapuai i le filifiliga tofi i lea po. E ui ua malolo le taumafaiga a le susuga Jerome Mika mo le nofoa o Manurewa, ae e lē uma ai le taumafai e saili malo mo le lumanai.
O le lesona na maua mai i le faaiuga ua iai nei i Manurewa, e toatele lava o tatou tagata e lē o malamalama i ala o faiga polokiki i Niu Sila nei, ma o loo mulimuli pogisa lava.
Afai e tatou te naunau ina ia toatele tamafanau a Samoa e tulai mai i tofi maualuluga o le palemene poo le faigamalo o Niu Sila, e ao foi ona avea ma sui totogi lafoga, ma ia auai i fonotaga ia maua ai le silafia o ala o mea.
O le avea ma sui totogi lafoga a le vaega faaupufai, e maua ai avanoa e ofi atu ai se leo i totonu o faaiuga e pei ona iai le faaiuga ua faia nei mo le itumalo o Manurewa.
Ua totoe nei o le nofoa i Te Atatu lea ua sauni atu nei i ai se tasi foi o alo o Samoa, le susuga Nick Bakulich, mai le alaalafaga o Vaovai ma Fogatuli, e tauva mo le tofi e sui tulaga i le alii o Chris Carter lea ua faatea ma le vaega faaupufai a le Leipa. Ou te talitonu foi, o ai lava e filifilia e fai ma sui o le Leipa i le itumalo o Te Atatu o le a faapena ona avea foi ma faipule pe a mae‘a le faigapalota o le tausaga 2011.
O le faaiuga o le vaiaso o le a sau e fai ai lea faaiuga. Ou te faamoemoe ia iu ma le manuia le tau a le alii o Nick Bakulich. O ia foi lea na manumalo i le Administrator of the Year Samoa Sports Award.
O le Aso Toonai ua tea na faataunuu ai le Samoa Sports Awards i le Pacific Events Centre i Manukau. E maoae foi le talenia o alo o Samoa sa manumalo i faailoga eseese o lea po. O le tamaitai o Courtney Meleisea, mai le alaalafaga o Poutasi, Faleu, ma Vaimoso na manumalo i le faailoga o le Junior Sportswoman of the Year ona o lana taaloga o le Taekwon-Do.
O le alii o Ethan Parker mai le afioaga o Faleasiu, Solosolo, Lepa, Saanapu, Fugalei ma Apia na manumalo i le Sonny Fai Memorial Junior Sportsman of the Year ona o lana taaloga o le Taekwon-Do foi.
O le tamaitai o Penita Davies mai le afioaga o Avao na manumalo i le faailoga o le AUT Coach of the Year ona o lana taaloga o le karate.
O le tamaitai o Solonaima Maria Tutaia mai Nofoalii ma Lefaga na manumalo i le faailoga o le Senior Sportswoman of the Year ona o le netipolo.
O le tofa ia Luatele Jerome Kaino o ia lea na manumalo i le faailoga o le Senior Sportsman of the Year ona o le lakapi, ma o ia foi lea na manumalo i le faailoga o le Overall Sportsperson of the Year.
O le tasi lenei o pine e iloa ai le talenia o tupulaga lalovaoa a Samoa o loo auai i le tele o taaloga eseese i Niu Sila nei. Na ou maua le avanoa ou te faatasi atu ai i le toe sauniga a le faletua o le faafeagaiga o le susuga Motu Matia o le Assembly of God i Favona, Mangere i le Aso Faraile ua te. Ua tele tausaga o tautua le susuga Motu ma lona faletua o Lealofi-O-Aana i le ekalesia i Magele. E lē gata i lea, ae tasi lenei faifeau e masani ona auai i fonotaga lautele a le komiuniti.
Ou te talitonu o se tasi lenei o faataitaiga e tāua tele mo isi faifeau. E lē gata sa galue ma le malosi le susuga Motu i totonu o le maota a le Atua ma lana ekalesia, ae sa faapena foi ona faasafua atu lona taimi ina ia auai atu i fonotaga faatasi ma le komiuniti lautele aemaise foi ma nisi o matagaluega a le malo.
E momoli atu ai faamafanafanaga ma faamaisega i le susuga ia Motu ma le nofoaalo faanoanoa. O le finagalo lava o le Atua e lē asa faamatafai. E toli le pula e fa‘i foi le moto. Ia alofa le Atua e alofa ia vave taape le ao pouliuli o loo ufitia ai le aiga faanoanoa aemaise le ekalesia.
