Ua maluelue le lumanai o le Mafutaga a Petesa

Avanoa le CD pese a tauaso mo le faatauina

E lei faigofie le taumafaiga mo le faamae‘aina o le CD pese a le mafutaga a Petesa, ona e telē se faaletonu sa alia‘e a o tau faaiuiu le galuega. O le faafitauli tau seleni sa faamoemoe mo le faagaioia ai o le faamoemoe, sa lē mafai ona toe maua ane mai se tasi lava o sui o le mafutaga sa tusi lima i ai mo le faataunuuina o le galuega.

E oo mai i le taimi na toe faamae‘a ai le galuega o loo taumafai pea se fesootaiga ma le tamaitai sa umia le seleni, poo fea ua faaaogā i ai, aemaise ai o fesootaiga ma le kamupani sa ta‘ua muamua e faatino ai le galuega. E lē gata i lea, ae na maua foi ua iai ni suiga i le mafutaga i ona tofiga.

O se isi faamatalaga sa maua mai i nisi o sui o le mafutaga e faapea sa fesiligia le tamaitai ua tuuaia i le seleni, ae sa ia faapea ane e faataatia mo le taimi nei ma tuu ai pea le CD e aua le toe loteina. Sa toe fesiligia foi ae pe faapefea le mafutaga, ae sa ia toe tali ane foi, e tuu ai pea foi ma le mafutaga.
O le toe taliu mai o le afioga i le Peresitene mai Samoa i sana malaga sa agai i ai, sa ia maua ai e lei faataunuuina lava le galuega. Sa amata loa ana suesuega ma fesootaiga, peitai ua talitualimaina e sui o le mafutaga aemaise lava o le tamaitai sa iai le tupe.

E oo lava foi i nisi o sui o le laulau, ua lē mafai foi ona toe maua se fesootaiga vavalalata sa iai muamua.

O le ala lea sa taumafai ai loa le tofa ia Tologataua o le taitaifono foi lea o le mafutaga, e toe totogi ni tupe i le kamupani sa amataina le galuega, mo le faamae‘aina ma le toe teuteuina o pese ma faia ai loa ma kopi, lea ua avanoa nei mo le faatauina atu i le maketi.

Ua faailoga fesili ai nei, poo le ā le isi laasaga o le mafutaga a tauaso, poo le Mafutaga a Petesa e pei ona iloa ai. E manatua pea se tasi o Toa o lenei mafutaga ua fai i lagi lana folauga, le susuga ia Leao Siitia, ona e foliga mai ua amata i se vavae mu itiiti le faaletonu i le lotoifale o Petesa.

E ui lava ina ina ua mae‘a ma ua toe sologa mālie le faalauiloaina o le taumafaiga a tauaso, poo i latou e po le silasila e ala i se tautua pese, ae o loo manaomia pea e le tofa ia Tologataua se tuufaatasiga a le asosi.

O i latou uma sa auai i le tuufaatasia o lenei auaunaga, ua toe tatalo i ai le tofa ia Tologataua ina ia toe taliu mai e faaauau faiga masani, atoa ai ma le mafutaga e pei ona sa amata mai. Ua amata faatauina nei le tautua pese a le asosi e ala i le CD sa amata faalauiloaina i le vaiaso talu ai. O se auaunaga ua luitauina ai le toatele ona o le faaaogāina e i latou o taleni e lē gata i siufofoga mālie, ae faapea foi i gaioiga uma sa faatinoina ai le tautua.

O nisi o i latou ia sa iloga lava foi le tulai mai i le tele o tausaga ua tuanai i le faatinoina lava o le taleni pese, ma e oo mai lava i le taimi nei o loo mafai pea ona faaaogāina a latou fatuga i luga o leitio ma faasalalauga. E lē gata i lea a o loo silisili ai ona faaiilaina le taleni lava o le pese i totonu o ekalesia ma aulotu taitasi o loo galulue ma tautua ai i le Atua.

O le tofa ia Tologataua sa feiloai ma le Samoa Times i le vaiaso talu ai, ma sa ia faamatalina le mafuaaga ma le autū na mafua ai ona a‘e se tofa mo le faatinoina o le galuega ua mae‘a nei. O loo tatala lava foi le avanoa mo sui o le mafutaga e tuuina atu i ai kopi o le galuega pe afai e manaomia.

O le pese sa tusia ma faaupuina e le susuga i le toeaina ua maliu, o ia foi sa taitaifono i le Petesa, Leao Siitia, o loo ua faaigoaina ai le tautua. O le “Fomai Mata” le igoa o le CD, ma ua faia e manatua ai pea lea foi tamā finau ma le malosi i lona foi taimi a o maua le malosi.

Sa ta‘ua foi e Tologataua e faapea o loo taumafai pea ma le malosi ina ia toe maua se mafutaga lelei ma sui uma aemaise ai o le laulau, ina ia mafai ai pea ona faaauauina le faamoemoe. O le CD foi o se vaega o ana galuega faaauau, ma e lē avea foi le CD ma auala e lepeti ai le mafutaga ma lona taunuuga e pei ona sa faavae mai ai i le amataga.