“Lo‘u agaga e ia faamanu atu i le Alii, o mea uma foi o i totonu ia te a‘u ia faamanu i lona Suafa Paia. O le leo ua alaga ma le viiga ua faateleina. O le loto faafetai foi ma le agaga o le faamanu”.
O lagona ia ma saafiafiga ia ua pepese ai nei e lē gata ia Rebecca Yeng-Tung, le tamaitai ua faauuina nei ma faamanuiaina i le maua ai o lona tusipasi faafaiaoga. Bachelor in Teaching Primary, ae ua faapea foi i nai ona tuaa, o aiga uma aemaise nai ana uo mamae sa auai atu i le aiga o le faafetai i le tapuaiga sa faia lea i Papakura i le Aso Toonai, aso 7 Me.
E lalelei foliga o le fiafia, e matagofie lagona o le faaeaina ae faasilisili ai ona sasala le manogi lelei o le faamanuiaina, ona o tauiviga ma taumafaiga ua faaiu ma le manuia. “Aua o le tama poto e mitamita ai le tamā, a o le tama valea e faanoanoa ai le tina”.
Ia malo le tauivi Rebecca, malo le tali manao auā o le uiga lea o le tuuina atu o fanau i a‘oa‘oga faatasi ai ma le lagolago malosi a nai mātua, ina ia tali mai i le faaeaina, e pei ona ua e taui ai le nofo tatalo ma le tapuaiga e lē gata i nai ou tuaa, ae faapea foi i latou uma o ē sa lagolago malosi ma tu‘i atu le mulipapaga a o e alofaiva i au suesuega faaleaoaoga.
O le vaitau foi lava nei o seleselega a nai mātua ona o nai alo ma fanau sa feagai ma a‘oa‘oga i Iunivesite e pei foi o le tamaitai o Rebecca Yung-Tung. “Ia Rebecca ia fai oe ma faiaoga e mapu atu i ai nai a tatou fanau Samoa i soo se aoga o le a faamanuiaina ai ma filifilia oe e te galue ai. Ia fua mai foi au galuega i ni fua lelei ma le matagofie, ina ia manuia ai le lumanai o fanau mo a taeao. Malo le toa, malo foi le tau!!
