(International Speech Competition Toastmaster New Zealand)
Na matuai faatumulia le Brentwood Hotel i Kilbirnie i Ueligitone i le aso 10 -12 o Me 2013, i le tauvaga lauga faaiu a Niu Sila mo lenei tausaga. O lenei tauvaga na sue ai se isi e fai ma sui o Niu Sila e tauva i tauvaga a le lalolagi e faia i Amerika i le masina o Aukuso i le tausaga nei lava, i totonu o le faalapotopotoga lenei o le Toastmaster a le lalolagi atoa.
O le faaiuga la o lenei tauvaga, na manumalo ai le sui mai Hawkes Bay o Kingi Biddle, tulaga lua le sui mai North Shore o Bablo German, ae tulaga tolu le alo o Samoa na fai ma sui o Aukilani, o Amituanai Timo Pepe.
Sa vaaia le faigata tele ona faia o ni faaiuga patino ona o le mataina ma le manaia o lauga na lafolafo ai i lea tauvaga. E toaiva sui mai totonu o Niu Sila atoa na tauva ai. E toafitu alii, ae toalua tamaitai. Ae toatolu lava na faamanuiaina ma mauaina ni faailoga.
O le alii lenei ua toe manumalo o Kingi Biddle, o le faalua ai lea ona manumalo i totonu o lenei lava tauvaga faalevaomalo. Na tulai mai foi o ia i le tausaga e 2011 e fai ma sui o Niu Sila, lea foi ua toe faamanuiaina i le tausaga nei.
I totonu lava o Niu Sila, e sili atu ma le toaselau i latou na muai tauva i nei tauvaga lauga faavaomalo, ma le naunautaiga ina ia oo atu i le tauvaga faaiu lea na faia i Ueligitone. O nei tauvaga na amata mai ia Fepuari o le tausaga nei lava.
E oo mai i le masina o Me, ua totoe ai na o le toaiva e tauva mo le sueina o le siamupini i totonu o Niu Sila.
O se faamatalaga a Amituanai Timo Pepe e faapea, e lē o se vaega faigofie tele le sauniuni atu mo nei tauvaga, poo le tofia foi e avea ma se sui tauva mai se aai e pei o Aukilani. Ae ina ua maua e Amituanai Pepe le tulaga lona tolu, o se fiafiaga tele lea ia Aukilani, ona o Ami, e fou mai i totonu o lenei faalapotopotoga o le Toastmaster, o lea faato‘ā atoa le sefulu masina talu ona ofi mai i totonu o lenei faalapotopotoga.
E toalua faiaoga o loo fesoasoani ia Amituanai Pepe. O le alii o Rob Bell o loo aoaoina Amituanai i le faaaogāina o le mafaufau. I le tele o ni aoaoga mo le faaaogāina i le taimi e tatau ai a o sauniuni atu mo nei tauvaga faatulagaina. Ae o le alii o Stephen Bhudai, o loo aoaoina Amituanai i le tautala, gaioi o le faaaogāina o le tino ma lima ma foliga (body language), o le faaaogāina o le gagana, ma le fesuisuiaiga o le leo ma faamatalaga i le taimi e tatau ai mo le faia o le lauga.
O se faamatalaga a Amituanai e faapea, na ala foi ona vave ona oo atu o ia i nei faailoga ma nei manumalo, ona o le lelei tele o faiaoga o loo feagai ai nei mo le aoaoina o ia i le tele o nei tauvaga lauga.
Fai mai Amituanai, “o le mea e te fefe ai, ona inā o loo faatalitali mai ai se taleni mo oe”. Fai mai a ia, o ia o se tagata e fefe tele e tu i luma o tagata ma fai ni lauga. Ae talu ona ia taumafai ina ia aveeseina mai le fefe lenei mai ia te ia, o lea ua ia mautinoa ai, o ia o se tagata ua fiafia tele i le failauga. O ia foi ua mafai ona ia laugaina le tele o nisi o mataupu mo le fia alualu i luma o le tagata soifua i luma o tagata lautele.
O se tasi vaega na ta‘ua e Amituanai, o ia e fiafia tele i le faitau tusi. O le tele o vaega e mafai ona e aoao mai i tusi e te faitau ai, o le tele foi na o lagona ma manatu e mafai ai ona e tautalagia ma faaalia mo se lauga.
E ui ina lē mafai ona faamanuiaina o ia i le tulaga muamua o lenei tausaga, ae iai lona talitonuga, “o lou tulai ma faia ni vaega e lē o mafai ona faia e le toatele, lona uiga ua avea oe ma se siamupini, po ua ia te oe foi le manumalo”.
O le lua sefulu o tausaga o le matua o Amituanai, na muai taunuu mai ai i Niu Sila ina ua mae‘a ana aoga i Samoa. Sa lagona le faigata tele ona sue se galuega ona o le vaivai tele o le tautala i le Igilisi. Ae o lona fiafia e faitau tusi ma talatalanoa i tagata i le faaaogāina o le gagana faaperetania, o le mafuaaga tonu lena na vave ai ona aveeseina mai le fefe e tulai ma faia ni lauga faalauaitele.
O nei tauvaga lauga faavaomalo, e faia i tausaga uma. O lea la ua toe nofo sauni atu foi Amituanai mo le tausaga fou, 2014.
