“E le fesiligia le malosi o suiga fou mai aoaoga a lotu laiti ua vave ai ona liliu ese tagata”
E ioe le afioga Patele Penitito Mauga o le sooupu o le Puleaga aoao a le Ekalesia Katoliko i Samoa, e toatele tagata faatuatua o le talitonuga Katoliko ua liliu ese mai le ekalesia ae ua ese tapuaiga ua auai atu i ai. E ioe foi le afioga Patele Penitito o le televave o suiga fou i aoaoga ma tala‘iga a isi lotu fou o le faatuatuaga kerisiano ua mafua ai ona vave liliu ese nei tagata.
O le finagalo o le sooupu e agai i le aotelega o le faamoemoe o le mafutaga a tupulaga o le ekalesia e le gata i Samoa, a o atunuu i fafo i Niu Sila, Ausetalia, Amerika Samoa, Hawaii, ma le Iunaite Setete o loo mafuta i Samoa mo le lua vaiaso.
“O le taimi lenei o suiga televavave ma e le tatau ona nofoa‘i ai taitai o le ekalesia”. Faaalia e le sooupu o le faatalaleleiga o tupulaga Katoliko e ala i polokalame o le mafutaga, o le a mafai ona fesoasoani ai i galuega tala‘i a le ekalesia e saga faatumau le ola talitonu ma uumau le faatuatuaga Katoliko o tupulaga o le ekalesia.
O le a mafai ai foi ona fesoasoani i le toe faia o galuega tala‘i mo i latou ua liliu ese. Peitai na tautino le sooupu e le o se tulaga o le a toe tauanau ai tagata ua liliu ese, auā o le latou lea filifiliga saoloto.
O le vaiaso na tea nei na agai ai polokalame o le mafutaga o loo auai le silia i le 4,000 tupulaga Katoliko, i le faia o faaevagelia tala‘i i vaega eseese o le taulaga i Apia, lea foi sa asia ai ma nisi o aoga a le Katoliko.
“O le tasi lena tāua o le mafutaga, ia tufa atu e tupulaga se feau tāua mo le ola faaleagaga o tagata, ia mafai ai ona tata‘iina mai pea loto o tagata i le faatuatua ma le talitonu i le galuega faaola na faia e Iesu”.
O le Aso Toonai na tea nei na faia ai se faauuga o ni alii Katoliko ua mae‘a aoaoga ma ua maua tofiga Pelepitelo poo le tofi faifeau Patele. O le nofoaga o le Tofamamao i Leauvaa o loo tauaofia ai le mafutaga a Tupulaga sa faia ai lea faauuga, ma sa faatumulia i aiga o alii faifeau ma uo aemaise le ekalesia aoao i ona ituaiga eseese.
O le taualuga lea o le mafutaga ma o le tatalo a le sooupu ia iai ni faalumaga o mea lelei mai le feau faakerisiano ua maua e tupulaga katoliko mai lea lua vaiaso sa faatasitasi ai.
O le nofoaga o le falepuipui i Tafaigata sa agai i ai le aumalaga toatele o tupulaga Katoliko mai Aukilani e silia i le to‘a 300 mo le faia ai o ni a latou tala faaevagelia ma faafiafiaga faaleaganuu, ma sa molimauina le faafiafiaina ai o le pulega o le falepuipui ua maua lea avanoa e tufa atu ai se feau faaleagaga mo i latou o loo tuli faasalaga.
