O aso faapenei, ua moni ai le upu a se tasi o tagata ta‘uta‘ua, “O aa o a‘oa‘oga e oona, peitai e fua mai ai le fua e sili ona suamalie.” (The roots of education are bitter, but the fruit is sweet).
Maeu le suamalie ma le tofo lelei i mātua ae tainane le tapuaiga a le aiga atoa, o lagona faafetai ona ua faaiu ma le manuia taumafaiga a le fanau, i le sailia o nisi o faailoga aloaia.
O le Aso Faraile 3 o Tesema sa tumutumu ai aiga ma uo o le alii loia o Mario Wynton Foliga Esera ma lona tuafafine o Ataga‘i Nannette Leitu Esera i le fale faamasino i Ueligitone.
O le aso lea sa faatino ai le tuuina atu aloaia o lenei tamaitai e avea ma loia e tulai i totonu o se fale faamasino i Niu Sila.
O le faaulufale ai o lenei afafine o le a mafai ai ona avea o ia ma fofoga o sē ua molia i lalo o le tulafono, pe finauina le sauāina poo le aveesea o aiā tatau ma saolotoga o tagata. O le tuafafine ia Ataga‘i ua maua lona faailoga faaloia, ma ua mae‘a foi ona a‘otauina faapitoa mo le tulai ai i totonu o fale faamasino i Niu Sila. O loo iai se faamoemoe o lenei afafine e amata lona soifua tautua faaloia i totonu lava o le laumua i Ueligitone.
O le susuga lava ia Mario Esera sa faatautoina lona tuafafine i luma o le Faamasino Sili. Sa auvasa mamao mai lenei alii loia mai Lonetona mo lenei faamoemoe. O le susuga ia Mario sa galue faaloia i totonu o le laumua o Peretania mo ni tausaga, ina ua uma lana tautua faaloia i totonu o le aai i Ueligitone.
O le tulai mai o nei foi alo o le atunuu i nei tofiga maualuluga, o se faamaoniga ola lea, e mafai ma e telē le avanoa e tulai mai ai fanau a Samoa i ni tofiga taualoa poo fea lava le atunuu o le lalolagi o aumau ai, ma faalauiloa ai le igoa o lona atunuu pele.
Ae o se luitau foi mo mātua, ina ia lafoai lagona lotovaivai ma le fiu gofie, ae ia unai pea ma lagolago malosi i nai alo ma fanau ina ia ausia o latou moemitiga i tomai ma agavaa e mafai ona ausia pe a lelei le lagolago ma upu faamalosi a mātua.
Sa malaga mamao mai le toatele o o la aiga mai ni isi vaega o Niu Sila, Ausetalia ma Samoa mo lenei sauniga faapitoa. O se aso fiafia tele lenei mo aiga o nei alo o le atunuu, ma sa faigata ona utufia loimata o le fiafia o aiga, ina ua faaulufale aloaia le afafine.
O Mario ma Ataga‘i e o mai i le alalafaga o Matatufu i Lotofaga, Satitoa i Aleipata, Taelefaga i Fagaloa, Satalo i Falealili ma Poloa i Tutuila. O alo o le Tofa ia Fa‘atili Iosua Esera ma le faletua ia Wendy Esera.
“Ave le mua i le Atua ona o nei faamanuiaga ua maua e auala mai i fanau, o lona agalelei ma lana faatonutonu folau, ua a‘e malo ai le taumafai o le fanau” o le manatu vaivai lea o le tofa i le Aliimau o Faleupolu.
