Ua mavae le tausaga ma aso, peitai e lē toe mafai ona faamaopoopo se ipuvai ua masaa ona o le misia o mafutaga ma le toalua ma le fanau pele ua momotu faafuasei i le oti.
O le taeao segisegi o le Aso Faraile aso 14 o Setema, na faamanatuina ai le tausaga talu ona tupu le faalavelave i sauaga a le afi, lea na maliliu ai le tamaitai Toga o Neti ma le nofoaalo e toa 5 i le 2011.
O Neti o le faletua o Faalafi Ieremia Lale (Safune & Apolima) faapea nai o la alo. Sa amataina i se sauniga lotu sa taitaia e le faafeagaiga ia Tala‘ife‘ii Aufai o le Ekalesia Uesiliana Metotisi Ausetalia. Na logomalie viiga sa lagiina e le aufaipese.
Sa faitauina le Tusi Paia e Rev Siologa Mapuilesua o le tausi matagaluega Ekalesia Metotisi Faasinoti a Algester. Sa auai mai nisi o le aiga o Faalafi Ieremia mai Samoa ma Niu Sila faapea nai tauaiga Toga o le tina ia Neti Lale.
O le tofa ia Faalafi Kamu Lale sa fai ma fofoga o le aso, sa tu tootoo foi i faaaloaloga ma se matu palapala i le aufaigaluega a le Atua ma Samoa potopoto.
O le sui failautusi o le Ekalesia Uesiliana Metotisi Ausetalia i Inala, susuga ia Faamalu Talauega sa faaleoina se agaga faafetai i le maualuga o teuga faatupu ma le faatamalii sa gapatia i ai aiga o le susuga ia Faalafi Ieremia Lale ma si o latou aiga atoa.
