O se vaipuna sa tafe i le tuaoi o Lepa ma Saleapaga, ua lē o toe vaaia le sau ai o se suavai i le taimi lenei.
O se tasi lea o fesoasoani tele i le afioaga o Saleapaga i le manaoga mo se suavai aemaise i vaitaimi o le tausaga e lē maua ai le suavai e agai atu i le nuu.
A o lei tulai mai le oge o le suavai i lea itu o le Atu Aleipata, ua leva ona tulai mai lea tulaga. Na faaalia e le Pulega o le Suavai, ua faamatala atu e inisinia na agai ma siaki lea vaipuna, e foliga mai ua mafua ona o le mafuie lea na lūlū ma tulai mai ai le galulolo na matuā āfaina ai nofoaga o le Atu Aleipata. E foliga mai o le mafuie lea ua mae‘a ae ua agai ai le suavai na puna ma tafe i le tuaoi o ia afioaga i le manava o le eleele. “Ua agai i lalo le suavai ae ua lē o toe puna i luga”.
O se pepa faalauiloa a le Pulega o le Suavai ua ta‘ua ai o loo faatautaia nei se sailiga mo nisi nofoaga e maua ai suavai e pei o vaipuna ma vaitafe auā le faatinoga o le auaunaga o le momoli o le suavai i maota ma laoa o tagata o Lepa ma Saleapaga i “nei vaitaimi o le ogaoga ai o le faigata o le mago o le tau” ma tau lē maua ai se suavai.
O inisinia a se kamupani Niu Sila e ta‘ua o le Bluebarn Engineering ua faapea mai o le a faatautaia se latou suesuega i le vai ua faaigoaina o Lano ina ia saili ai se suavai e mafai ona fafaga ai le paipa mo le auaunaga o le suavai maua i lea itu o Aleipata. O lea ua la‘u le suavai i ia afioaga mai i se loli vai.
Ua faapea foi ona aafia afioaga o Matu i Saute o Savaii i afioaga o Falealupo, Neiafu, Papa i Sataua faapea ai Asau. O loo faatalitali Falealupo i le taunuu atu o se afi mai i le EPC e faaola ai le pamu e taumafai ai e aumai le suavai mai i nofoaga o loo eli auā se suavai mo lea itu o le motu tele. O le tele o suavai o lea itu o Samoa o loo faapea ona tanu i le manava o le eleele ma e faigata tele ona pamu mai i luga seiloga e lelei meafaigaluega e faatino ai lea galuega.
O le eletise lava o loo faamoemoe e mafai ai ona pamu mai le suavai mai le manava o le eleele i ia afioaga. O le faafitauli tele ona o loo faigata lava ona ola faasoloatoa le eletise i ia foi afioaga, ae a lē lelei le ola o le eletise, lea e moomia e masini tetele nei mo le pamu mai o le vai, e iu ina leaga ai masini ma atili lē maua ai se suavai e pamu mai i le eleele.
O le maouta o nofoaga o loo iai vaieli nei e faigata tele ona oo i ai le eletise, o lona uiga e moomia se afi e faaola ai pamu nei mo le maua ai o se suavai.
O le afi la lea ua ta‘ua e tatau ona oo mai i Samoa i le faaiuga o le masina lenei. O le faamoemoe o iai nei ina ia mafai ona fesootai uma nofoaga nei e maua ai le suavai ma ia ta‘i mai ai le suavai i ia afioaga e pei ona ta‘ua i Falealupo, Neiafu, Papa Sataua ma Asau.
A tuufaatasi le suavai maua mai i ia nofoaga i totonu o afioaga nei e fā, o le a mautinoa le tele o se suavai maua ma o le a faasoasoa lelei i aiga o ia afioaga. Faaalia e le Pulega o le Suavai, ua iai foi nisi ua fautuaina le tatau ona fau ni faatanoa tetele e agai i ai le suavai mo le faasoasoa lelei, peitai na ta‘ua e le Pulega le faigata tele o lea fuafuaga pe a faatino. E fai o le taugata o le fausia o ia nofoaga tetele, ae o le toatele o tagata e moomia latou te fausia.
Faaalia e le Pulega le tele o manaoga ina ia faaputuputu le suavai i nofoaga nei ma e moomia masini aemaise foi o masini e mafai ai ona faatino le faamamāina o le suavai o le a maua pe a fausia ia ituaiga nofoaga.
Ta‘ua e le Pulega o le suavai, o le taimi lenei o le tele o faatanoa ua amata ona mamago auā e ui i ni nai timuga o loo molimauina i le atunuu, e lē taitati lava ma seiloga lava ua fai ifo le vaitau o le mugala ona faato‘ā iloa foi lea ua tele le suavai maua i le timu ma fafaga ai vaitafe ua tele masina o leai se suavai o toe tafe mai ai. O vaitafe la na ua mautinoa lava le lē maua o se suavai ona o loo tele ina faaaogā i atina‘e, ae o le vaipuna o Lepa ma Saleapaga lea na tafe lava i le tuaoi o ia afioaga, ua matuā mou e se lava mai i le nofoaga sa vaaia le tafe ai.
O loo faaauau lava talosaga ma fautuaga a le Pulega o le Suavai i le mamalu uma o le atunuu ina ia tautuana le suavai ina ia mafai ona faasoa atu i tagata ua aumasinā o faatalitali i se auauanga faaauau o le suavai.
