O le umi ona faatali o visa mo le au fusu a Samoa e malaga atu ai i Saina i le aai o Wuhan, na faamoemoe e faia ai fusuaga mo le sailia lea o ni o latou avanoa i taaloga a le Olimipeka e faia ai i Tokyo Iapani i le tausaga lenei, ua fetaui tonu ma le pepesi ai o le siami poo le vairasi o le coronavirus lea ua lē taunuu ai ona malaga le au fusu a le atunuu.
O le fonotaga a le faalapotopotoga o fusuaga a le atunuu ma le ofisa o taaloga le SASNOC i le amataga o le vaiaso na te’a nei, na logo ai e le ofisa o taaloga a le atunuu le faalapotopotoga o fusuaga ina ia ave na’o sui numera tasi ona e fua uma fuafuaga i luga o le seleni. E le’i talia gofie e le Faalapotopotoga o fusuaga a le atunuu lea faaiuga ona o le manatu i alo ma fanau ua leva ona koleni ma tapena e malaga i Saina. Peitai o le aso na soso’o ai na logo aloaia ai e le Ofisa o Taaloga a Samoa, le Faalapotopotoga o Fusuaga i le lē taunuu ai lea o ia taaloga i totonu o Wuhan i Saina ona o le pepesi ai o le coronavirus.
E iai le talitonuga o le tatou nusipepa, o i tonu lea na maua ai se mapusaga mo le pulega o fusuaga a le atunuu, i sa latou faamalataga e tuuina atu i fanau ma matua, i le faaoga ai lea o le siama lenei o le coronavirus ua pepesi ai i Saina ina ia talia gofie ai e le fanau ma o latou matua se faamatalaga ona ua leva ona tolauapi le aufusu. Na fa’ataape ai ma le togālauapiga a le aufusu i lea aso ae toe foi atu fanau i o latou aiga ina ua le taunuu ai le malaga i Saina.
Ae i se imeli na tuuina mai i le ofisa tutotonu o taaloga a le Olimipeka Switzerland agai i le ofisa o taaloga a Samoa na tāua ai, le suia lea o le atunuu e faia ai ia taaloga. O le aso 3 agai i le aso 11 o Mati o le tausaga lenei o le a faataunuuina ai ia taaloga i totonu o Amman i Jordan. O taaloga nei mo le faaitulagi lenei o le Oceania ma le atu Asia ina ia faamautu ai ni o latou avanoa mo taaloga a le Olimipeka o lenei tausaga.
O se tasi lenei o faafitauli tele ua fetaiai nei ma fusuaga i le faaitulaga lenei a le Oceania e aofia ai Samoa, Fiti, Toga, Niu Sila, Ausetalia ma isi motu uma o le Pasefika, ona sa masani lava ona faia taaloga e qualify ai vaega eseese o le lalolagi mo taaloga a le Olimipeka, peitai, o le suiga fou ua iai nei, ua tuufaatasi uma qualifying tournaments a Asia ma le Oceania ae faia ai i totonu o atunuu Asia, o se faafitauli tele mo le Oceania i le mamao faatasi ai ma le taugata o pasese.
Mo le sui e toatasi o le au fusu a Samoa e malaga ai i totonu o Amman, Jordan e latalata i le $9000 tupe Samoa le pasese e malaga ma toe foi mai ai, ae e le’o aofia ai i totonu le tau o faletalimalo. Saunoa se tasi o sui o le pulega o fususga a le atunuu le susuga Faletolu Su’a, ua fai si taugata tele o le atunuu lea o le a faia ai nei fusuaga, toe mamao ma le aufusu a Samoa.
O faafitauli uma nei ua tulai mai i fusuaga Amateur a le lalolagi na mafua mai ina ua faamalolo le pulega o fusuaga talu ai ae filifilia ai se komiti faapitoa latou te faatautaia fusuaga nei mo le agai atu i taaloga a le Olimipeka. E oo mai i le taimi lenei e lei maua lava se faaiuga e faatatau i suesuega o faagasolo nei i le pulega o fusuaga a le lalolagi poo le AIBA i le faitau miliona o tupe o fusuaga poo fea ua alu iai.
O se aso o le vaiaso lenei e faatoa fono ai le pulega o fusuaga i Samoa e talanoaina ai le lumanai o le au fusu a Samoa pe taunuu ona malaga ai i lea taamilosaga i Jordan pe leai.
