O le mataupu o loo tulituliloa pea e le Samoa Times i ana suesuega, o se vaega o ni tagata Samoa taufaasese i le faia o talosaga nofomau, ma saili tupe ai i le afu sisina ma le tigaina o isi foi uso a tagata o Samoa lava.
E pei ona lomia i vaiaso e lua talu ai igoa o i latou, atoa ai ma le galuega saili o loo faagasolo pea mo le sailia poo fea o lalafi ai ma sosola i ai ma ave tupe, ae leai ma se galuega sa faia.
O le tamaitai o Lisa Faalogo sa na ona valaau ane i se tasi o aiga mafatia, ma fesili i ai poo ai na faailoaina le mataupu i le nusipepa.
Sa tali le aiga, o i matou lava, sa toe faanoi ane, pe mafai ona oo ane e toe faafoi tusifolau. Peitai sa toe fesiligia e le aiga, pe o le a faafoi ane na o tusifolau, ae faapefea tupe na totogi atu i ai.
Sa faapea ane le tamaitai, o le a talanoa i tupe pe afai ae oo ane muamua ma tusifolau.
Sa talia e le aiga ma atofa loa le aso ma le taimi e feiloai ai i le fale o le aiga lea i Otara.
Peitai na fiu e tatali ma sa tuanai ai lava ma le taimi sa malilie i ai, po foi ma lea aso e lei vaaia lava le tino o le tamaitai o Lisa Faalogo poo Lisa Brown.
O le toe vaalaau atu i ai ae na faaalia ai le faanoanoa tele o lenei aiga, ona ua toe faaopoopo le isi pepelo i luga o isi foi pepelo e lei pepē atu lava.
O se tulaga e foliga mai ua toe atili ai ona matamata tetele le faafitauli, ona o le faaauau pea o faiga pepelo ma le taufaa‘ole‘ole.
O loo faatalitali pea le aiga, pe toe valaau ane le tamaitai o Lisa, pe leai ae pe o afea foi o le a toe manatu ae ai se isi pepelo, o loo tau fatufatu mo le taimi nei.
O ai e ona le tusitupe sa tiposi i ai le tele o afe ma afe tala
Sa taumafai foi le Samoa Times agai i le faletupe e patino i ai le numera o le tusitupe (account number), e pei ona maua mai i se tasi o aiga i Aukilani i Sisifo.
Mo le silafia, e iai lava aiaiga ma tulafono a le faletupe i le tulaga o le puipuia o faamatalaga lilo mo tagata uma (Privacy Act).
Sa taumafai pea le Samoa Times i lona malosi e gata ai, talu ai o le fia mautinoa lava poo mafai ona tatala pea lea teugatupe, ina ia maua ai se isi faamatalaga fou e fesoasoani i le sailiga o loo fai nei.
Peitai sa tutumau pea le faletupe i lana tulafono ma le tausia o le aotelega o tulafono a Niu Sila e laugatasia uma ai tagata.
Na pau le tulaga sa mafai ona oo i ai le malosi o le finau atu pea i ai, o le mafai lea na ioe mai ma ta‘ua ai, o loo iai pea lea teugatupe, ma o loo faaaogāina pea e oo mai i le taimi nei.
Sa lauina uma i ai igoa o le vaega e toalima, ma na ioe le faletupe o se igoa e tasi o le toalima lea, e ona le teugatupe.
Ua lava lea e tau agai i ai suesuega, ma o le mea sili ua mautinoa o loo faaaogā pea le teugatupe, ma o se isi taiala lelei lea o le a fesoasoani tele i le mataupu.
Misiona Mamea
Ua na o Misiona e foliga mai ua matuā naunau e feiloai mai i le Samoa Times, ma lona manatu o le a ia faailoa uma faamatalaga ma vaega e uiga i le isi toafa, Lisa Faalogo, Elise Tiatia, Tanielu (Don Parker) ma le tamaitai o Anastasia.
E faalua ona toe sui taimi o le feiloaiga ma Misiona i le vaiaso talu ai ona o le pisi ma nisi o tulaga sa lē mafai ai ona taunuu le feiloaiga ma ia.
Na faamaonia mai e Misiona i nai taimi sa talanoa ai i le telefoni, o ia foi le isi tagata o loo mafatia, ma sa lavea muamua i le tui malosi a Lisa ma lana vaega.
Na ia ta‘ua o lana fanau mai Samoa, sa taumafai foi e le vaega lea, ma e oo mai i le taimi nei e lei manuia, ae ua lē toe maua foi ma tupe latou, ma o loo mafatia tele ai.
O lana molimau o le amataga lea o le latou feiloaiga, ma aveave ai pea seia oo ina mavaevae ma ua tetea faafuasei ona o le pepelo lava.
Peitai e ui i lea, sa naunau pea Misiona mo se feiloaiga o le a ia matuā tatala mai ai feuiaiga ma faamatalaga e uiga i le latou vaega.
