“Ua ou tau tōmanatu nei e pei ole tausaga e 2002 na litaea ai Laauli mai le Iuni ona ua lē atoatoa le malosi o lona tino ua matua foi. O a’u foi ia pei ua ou tau sela atu ai ile tele ole gaosa o nei mea o lakapi.”
Ua ono aso talu ona lafoai lona tino i lona tuugamau le susuga Laauli Alan Grey, ae ole valaau ale Atua i lea tamalii faipisinisi iloga o Samoa ole a lē galo ai le tele o ana tautua ile atunuu. Ole atinae o tagata tafafao ma le taaloga lakapi.
O i latou sa vavalalata le mafutaga ma Laauli latou te silafia uma uiga tausaafia o lea tamalii, auā ose tagata e lē leoa ona uiga. E agamalu loto maualalo ma loto alofa i tagata. Ose talanoaga faasamasamanoa ma lona atalii le susuga Fred Grey ile tausaga ua mavae na ta’ua ai e Fred o pisinisi uma a lona aiga ei le va ole luaselau ma le toluselau tagata oloo galulue ai.
O faletalimalo e lua i Mulifanua ma Vaisigano, ole pisinisi ole vai faamamā oloo faatau i fafo, ma le kamupani asikulimi ma vaiinu suamalie le Apia Bottling oloo i Taufusi. E faaopoopo iai ma le aufaigaluega i faatoaga ma lafumanu ale susuga Laauli ma lona aiga.
O molimau uma i aso o toe sauniga ole tamalii e leai se isi na ese se mau ile soifua galue o Laauli, auā o molimau ose tagata e naunau e faatino lana tautua ile mea silisili. Ole molimau foi lea ale afioga ile Palemia susuga Tuilaepa L Sa’ilele Malielegaoi:
“O Laauli o se tasi o i latou to’aitiiti na ulua’i filifilia faapitoa e lo tatou Malo e faaee i ai le pine taualoa ale tatou Malo. O mamalu maualuga ia faalupelupe faalemalo e aloaia ma amanaia ai se tautua ua maualuga ma maoa’e mo le atunuu.”
“O lenei pine taualoa ua faaigoa ole Western Samoa Order of Merit, na tauaaoina ile tausaga e 1993, ile taimi lea a’o lei suia le igoa o Samoa mai le Western Samoa ile upu e tasi SAMOA, ina ua soloia ese le upu Western ona avea ai lea ole igoa ole tatou atunuu ma Samoa moni ma Samoa moni ai le faalupega ole tatou Malo.”
“E lē o natiaina le sao o lenei tamalii ile atina’eina o alamanuia o turisi, o i latou ia o ē asiasi mai i Samoa. Oloo pito maualuga foi lona sao ile faafaigaluegaina o fanau a Samoa, aemaise le faatupulaia pea o teugatupe mo le sologa lelei ole faaulufale mai o oloa eseese e moomia e o tatou tagata. Tupe ia a isi foi atunuu e taulia i na foi atunuu mo a tatou oloa e fia okaina mai.”
“Ole faagaioina foi ole latou faletalimalo ole Aggie Grey, pau lea ole faletalimalo na tulagaese lona sao ile faalauiloaina ai o Samoa ile lalolagi, ona sa matuā faaaogā ai le ituaiga taligamalo tonu faasamoa, ole faafeiloai o i latou faatoa taunuu ile faletalimalo i laufofoga fiafia ma upu masani ole feofoofoa’i ma toe faatofa foi ma faamavae ia i latou ile taimi ole a tuua ai Samoa faapei oni mafutaga ua motusia faaleaiga i Samoa.”
“Ma sa atili ai ona iloa faalauaitele ile lalolagi e i latou e asiasi mai ma nonofo mau ai ile Aggies Hotels, le uiga ese maoa’e foi ole tausaafia ma uiga faamasani gofie o tagata i o tatou tagatanuu o Samoa, uiga mafana ia e tupu ai foi ma lagona o e asiasi mai i Samoa ma nonofo ai ile faletalimalo o Aggies. O se siosiomaga fiafia faaleaiga truly a home away from home”.
“Sa lei tau faailoa ai lenei atina’e tāua ini faasalalauga faapitoa taugata, o tala ave lava tuufofoga a i latou na malaga mai. O latou foi na latou toe faasalalauina i aiga uō ma ē masani le talalelei ile faletalimalo lenei ta’uta’ua ma logologoā ma atili lauiloa ai lenei faletalimalo i atunuu i fafo atu o Samoa, ma ta’uta’ua ai ma le igoa o Samoa. O faataitaiga lelei ia e oo mai nei i ona po nei, e lē o mafai lava ona faia e se isi lava faletalimalo i Samoa nei.”
“Ole vaega lua ole soifua o Laauli, ose tagata e loto maualalo tele, ae na oo lava iai le faatofala’iga ale Komiti o Pine ma Mamalu Taualoa a lo tatou Malo.
Ole sao lea o Laauli ile faagatama ole lakapi, ile faafaileleina lea ole ‘au a Samoa; le Manu Samoa mai lava ile amataga se’i tau mai lava ile tausaga 1997 ina ua lauiloa lea ole Manu Samoa ua ofi atu i tauvaga lakapi ale lalolagi. Sa faatupe toatasi lava ma tauave e Laauli fitā ma faigata ole tau faamaopoopoina o lenei aulakapi ale atunuu, leai lava ma se lagolago ale tatou Malo e pei ona ua iai nei.
Sa faaaogā ai lona faletalimalo ma seleni ole pisinisi i sailiga malo a fanau a Samoa, ile faalelea ai lea ole tagavai o Samoa i malae taaalo lauiloa ole Lalolagi.”
“Ina ua liliu le taaloga e avea ma taaloga faapolofesa ile tausaga e 1997, na taunuu ai le iuni ise faaiuga tāua tele ua lē mafai ona tatou faaauau pea ona faatupe le taaloga lakapi ua taugata tele mo se tagata e toatasi. Ole mafuaaga lea na faatau atu ai le Manu Samoa, ma pulea ai e ni alii mauoloa se toalua i Niu Sila, o Sir Michael ma Fay Richwhite.”
“Ina ua avea a’u ma taitaifono ale Iuni Lakapi a Samoa, ae see ane Laauli e avea ma sui taitaifono ile 1999, sa ma galulue faatasi ai ma lenei foi Toa o Samoa e toe faafoi mai le pulega ole Manu Samoa i lo tatou lava atunuu ile mother union, ina ua matou iloa ua amata ona fe’alo’alofa’i le aumauoloa ia a Niu Sila, e auai le Manu Samoa i nisi o taaloga faitauina faavaomalo ma e tasi lava le mafuaaga na matou iloa, ua gau aano foi nei alii ile taugata tele ole faatupega ole tatou aulakapi, lea la na toe foi mai ai le pulega ole Manu Samoa ile Iuni.”
“Ua ou tau tōmanatu nei e pei ole tausaga e 2002 na litaea ai Laauli mai le iuni ona ua lē atoatoa le malosi o lona tino ua matua foi. O a’u foi ia e pei ua ou tau sela atu ai ile tele ole gaosā o nei mea o lakapi.”
“O upu faaiu ale tatou Malo e fai lea ile sauniga faaiu i lona oliolisaga tumau. Ole tagavai ole Malo lea ua tatala, ole faafeao e Alii ole Malu ole Malo ole Sa ole susuga ia Laauli, ole toe fa’alo lea a lo tatou Malo ma le atunuu i lē ua tatau iai le faaaloalo. Manuia tele lau malaga Laauli, faamaise foi ile faletua ma le aiga faanoanoa.”
Oloo lagomau le susuga Laauli Alan Grey i lona maota i Afiamalu lea oloo lagomau ai isi o lona aiga e pei o lona tuaa o Aggie Grey.
