A tasi le loto e ui ina faataunuu tulaga masani e pei o palota, e iai lava le lotogatasi i se mafutaga.
O le ala foi lea na vave ma faigofie ai mataupu o le fono faaletausaga (AGM) na alo atu i ai le Mafutaga a le Logan Samoa Advisory Council Inc i le Aso Toonai i le aai o Logan City.
Na muai tatalaina le fono i le tatalo puupuu na saunia e se tasi o tamā matua o le mafutaga ia Fiu Tyrell. O le Sui Peresitene o le Mafutaga Veletaloola Kaleopa sa taitaia le fono na see atu i polokalama masani mo fono faaletausaga.
E tele naua isi matagaluega ua osia nei faiga faapaaga ma le Logan Samoa, e iai le Women’s Federation World Peace Program, Community & Cultural Linguistic Diversity, Working Against Violence Support Services, Centre Against Sexual Violence, Brisbane Youth Detention Centre, Queensland Police Services faapea le Gunya-Meta Inc.
O le susuga ia Barry Watson le Pule o le kamupani o latou fai paaga le Gunya-Meta na ia faatautaia le faiga palota. Na toe palota ma autasi le Mafutaga atoa mo le toe filifilia o le afioga i le faletua ia Lesa Changwai e toe tu mai le tofi Peresitene.
Na filifilia le susuga ia Tapuala Dave Ropati e avea ma sui Peresitene, Teutupe ua see i ai le faletua ia Bessie Maria Ngau Chun.
O le Failautusi ua toe filifilia i ai le faletua ia Uo Alalatoa Brown, Public Officer ua toe filifilia i ai Site Ah See, o le Laulau-a-fono fou lea a le Logan Samoa 2014-2015.
Na maualuga le faamoemoe i le auai o nisi o tamā matutua o le mafutaga, le susuga ia Fiu Tyrell, Lomiga Wilson, Pauga Leu‘ea, Veletaloola Kaleopa faapea le tina matua ia Penina Kaleopa.
Na faamae‘aina le fonotaga i se taumafataga tele na saunia lava e sui resitara, ma ua tolopoina nei le fono mo le 14 aso, mo le uluai fono a le laulau ua filifilia nei.
