O le vaiaso ua tea sa ou auai i le malaga faapitoa i atunuu a Europa a le Komiti o le Va i Fafo a le Palemene. O se tasi o autu a lenei malaga ina ia feiloai ma atunuu a Europa mo le faamautuina o se feagaiga mautu mo le faafetauaiga o oloa ma auaunaga i le va o Niu Sila ma le Iuni o Europa (European Union) poo le faalapotopotoga tuufaatasi o atunuu o Europa.
E tolu atunuu faapitoa o Europa sa matou feiloai ma latou faigamalo e faatalanoaina le fuafuaga mo lea feagaiga. Na muamua matou feiloai ma Tenemaka (Denmark) ina ua matou taunuu atu ma ioe lea faigamalo i le matou talosaga. Na faapena foi matou feiloaiga ma le faigamalo a Suetena (Sweden). Ona sosoo lea ma le matou feiloaiga ma le faigamalo a Peleseuma (Belgium) sa ioe foi latou i le matou talosaga.
O nei atunuu e fiafia tele ia Niu Sila. E talitonu foi latou e tutusa Niu Sila ma latou faigamalo i le faamaoni i le tausiga o tulafono. E fiafia tele latou ona e leai ni taua o loo tutupu ia Niu Sila. E fiafia foi i le lelei o oloa a Niu Sila o loo maua atu i maketi a Europa, aemaise le mamoe, suasusu ma le paka.
E ui o loo maua nei oloa i o latou foi atunuu, ae e fiafia tele tagata o latou atunuu i le manaia ma le lelei atoatoa o oloa mai Niu Sila. E toe maua nisi faamatalaga i le isi 2 tausaga o i lumanai i le faamautuina o lea feagaiga.
Sa ou maitauina o nei atunuu e maoae tele le maualuga o le tamaoaiga. E sili atu tupe maua a tagata i nei atunuu i lo tupe maua i Niu Sila. E ave le faamuamua a nei atunuu i le lelei atoatoa o le tausiga o aiga. E mafai e se tina ona malolo mo le tausaga mo le tausiga o le fanau laiti ae maua pea lona totogi, ma maua foi le fesoasoani a le Malo.
E leai se isi e faaletonu se fale e nofo ai. E ese le mafanafana o fale e ui na matou taunuu atu e matautia le malulu o le tau. E foliga e maualuga totogi maua a le aufaigaluega. E maua meaai a tamaiti aoga i latou aoga, e amata mai i aoga faataitai seia oo lava i le Kolisi. E tausi lelei e nei atunuu tagata matutua ua ritaea, faapena foi tagata o loo maua i ma‘i o le tino, ma i latou ua leai ni galuega.
E tele le eseesega o nei atunuu ma Niu Sila i le tulaga tau aoga, soifua maloloina, fale ma penefiti e fesoasoani ai i tagata lautele. E sili atu ona maualuga ma lelei le tulaga o o latou tamaoaiga nai lo Niu Sila.
E foliga mai ia te au, e mafua ona lelei nei vaega ona o se atunuu e mauoa. E tele pisinisi o loo faatau latou oloa i atunuu eseese o le lalolagi, ma tele ai tupe maua a nei atunuu. Talu ai le lelei o tupe maua a nei pisinisi ua masani foi latou i le totogi lelei o le aufaigaluega. Ae o le tulaga pito i sili ona maoae, o le maualuga o lafoga totogi e ao e le Malo.
O se faataitaiga, o le lafoga o le GST a nei atunuu ua silia ma le 20 pasene. A o lafoga totogi a le aufaigaluega e latalata i le 60 pasene mo i latou e aupito i sili ona maualuga o latou totogi.
Fai mai le latou talitonuga, ua masani lava latou tagata i le maualuga o lafoga totogi, ina ia mafai ai ona faatupe e le faigamalo polokalame e aogā mo le tausiga o aiga, le fanau, tagata matutua, tagata o loo maua i ma‘i, ma tagata e manaomia le fesoasoani pe afai ua leai se galuega.
O le lesona tāua e maua mai nei atunuu e tatau ona saili muamua ia tele ni tatou alaoa. E tatau ona lelei totogi e maua e le aufaigaluega. Ma e tatau ona malilie uma tagata ia sii lafoga totogi mo le faatupeina o polokalame e aogā mo le fesoasoani i tagata lautele.
E ese mai le faavae o nei atunuu mai le faavae o lea ua faavae ai e John Key ma lana vaega le faigamalo a Niu Sila. Pau lava tagata o loo manuia mai i faiga faavae a John Key ma le National o latou o le aumaumea. A o le toatele o tagata Niu Sila o loo feagai ma le leai o ni galuega, maualalo o totogi maua, faigata ona maua fale, taugata le tau o le soifuaga.
E lē gata i lea ua tele ina faapa‘ū lafoga totogi a le aufaipisinisi ma latou e maualuga latou tupe maua. O lona uiga, afai ua tatou mananao i le faigamalo ia faalelei polokalame e fesoasoani ai i tagata lautele, e tatau ona ioe le aufaipisinisi ina ia lelei totogi a le aufaigaluega. A e ua tatau foi ona malilie le Atunuu ina ia sii i luga lafoga totogi, aemaise mo latou e tele latou tupe maua mo le totogiina o polokalame a le Malo.
E lē mafai ona faia nei suiga se‘i vaganā ua malosi le tamaoaiga o Niu Sila, lelei oloa o loo gaosi iinei, ma lelei totogi a le aufaigaluega. O le luitau la lenei mo Niu Sila mo le lumanai.
Ona tatou liliu mai lea i le lumanai a le vaega faaupufai a le Leipa. O le Aso Toonai ma le Aso Sa ua tea na potopoto ai sui auai a le Leipa i Ellerslie mo le fonotaga faaletausaga.
E lē gata o le tapenaga o faiga faavae mo le lumanai sa finauina, ae ua faamautu ai foi suiga o tulafono faalotoifale mo le filifiliga o le taitai o le Vaega a le Leipa. O suiga fou ua iai, o le a auai uma sui auai totogi lafoga a le Leipa i le filifiliga o le taitai.
E amata atu i le tausaga fou le faaaogāina o ia suiga pe afai lea e ioe i ai faipule. Ae afai lava e lagolagoina e le 61 pasene o faipule le taitai o loo iai nei, e tumau pea o ia. Ae afai e lē maua le lagolago o le 61% o lona uiga, ua lafo loa e fai le faigapalota a sui a le Pati poo ai e avea ma taitai o le vaega a le Leipa mo le tausaga 2013.