Na savalia ai e sui o le Ekalesia Soofaatasi i Samoa, i le vaiaso na tea nei le taitai o le atunuu, le Susuga Tuilaepa Lupesoliai Sailele, mo se fesoasoani a le malo, i le mataupu ua samania ma tutulai ai faifeau Ekalesia Faapotopotoga Kerisiano Samoa, EFKS i luma o le faamasinoga, ona o le tetee atu i le totogi lafoga. Na faaalia e le Palemia, o le savali a le taitaifono, Leaupepe Kasiano, Pelesetene o le Ekalesia Metotisi, Le Susuga Aisoli Iuli, ma le failautusi le Susuga Maauga Motu, na o latou toe talosagaina ai le toe silasila o le malo, i se faatatauga mo faifeau ua aafia i le tulafono o lafoga.
O le saunoaga a le Palemia, ua augata lona taofi e toe tuuina atu se tali i le savali a sui o le fono a Ekalesia, ona ua i le tulafono le mataupu ma ua fofogaina foi i luma o le faamasinoga. “O se faamatalaga faigofie lava ia ua tautuaupega le mataupu pei ona savalia ai le malo.” Saunoa foi Tuilaepa, na ia fesiligia, le loia sili a le malo, o le loia a le komisi e toe fuataiina tulafono ale atunuu, aemaise le minisita o tupe maua a le atunuu, i se avanoa e faaona toe fetuunai ai le mataupu, peitai o le tali na tuuina atu ia te ia, e le toe maua se avanoa ona ua i le faamasinoga le mataupu.
“O le avanoa lea na ou tulituli ai loia ma le minista pe toe maua ai se avanoa o faifeau a lena foi ekalesia, o le leistala, peitai ua manino mai e faigata leaga ua faagasolo le tulafono..”
“Ua faigata foi ona toe iai lava se isi itu e toe feiloai ai, e toe soalaupule ai le mataupu.” O le feiloaiga pei ona taua e le palemia, na aofia ai ma le loia sili o le malo, o le taitaifono o le komisi o le toe fuataiina o tulafono i le atunuu, ma le minisita o tupe maua a le atunuu.
O le vaiaso na tea nei, na toe valaau ai i luma o le faamasinoga faaitumalo a le atunuu, le mataupu a faifeau e toa luasefulu, lea e aofia ai ma le taitaifono, le Susuga Senara Tautiaga, ma le sui taitaifono, le susuga Tunumoso Iosia.
E lei tuuina atu ni a latou faamatalaga, e latou te ioeina pe teena moliaga e lua faasaga ia latou, o moliaga o le lē usitaia o le tulafono o le totogi lafoga e pei ona pasia i le tausaga na mavae nei. O le vaiaso na tea nei, na talosagaina ai ele loia o loo tulai mo le ekalesia, Alex Su’a le faamasinoga, mo le faasee atu o le mataupu e suesueina i luma o le faamasinoga maualuga i Apia. O le autu o le talosaga a le alii loia, ona o le vaega o le latou finauga ua aafia le vaega o le Faavae o Samoa, ma e leai se malosiaga i le faamasinoga faaitumalo e suesue ai na o le faamasinoga maualuga.
O le vaega o le faavae ua aafia lea ua finauina, o le faailoga lanu ma tulafono, poo o le Discrimination and Legislation, ma e talitonu le loia a le ekalesia e le suesueina i le faamasinoga faaitumalo. O le tali a le alii faamasino na ia faafoea lea mataupu, o le tuuina atu lea o faamatalaga tusitusia, i le aso muamua o Mati, e faailoa atu ai poo a ni aiaiga e mafai ai ona o latou faamaonia, ua agavaa le faasee o le mataupu i le faamasinoga maualuga. O loo taoto foi le uluai talosaga a le loia, ina ia faaleaogaina moliaga faasaga i faifeau, aemaise o le taofia ona toe molia se isi faifeau i moliaga o le lē totogia o lafoga.
I fafo mai o le faamasinoga na fesiligia ai le loia o loo fesoasoani ia Alex Su’a, le faletua ia Leilani Tamati, i le talosaga pei ona toe talosagaina, aemaise o le itu lea ua tāua ai le faailoga lanu i lalo o le Faavae o Samoa, ae na faalia e Leilani, o le aafia o faletua o faifeau, i le faagaioiina o lafoga, e latou te silasila ai i le lē sa’o ona faatino o lea faiga. O le vaiaso fou e toe valaau ai le mataupu.
