2 Timo 4:9-18
“Ia e taumafai ona sau ia te au ia vave lava. Aua ua tuulafoaiina a‘u e Tema, ina ua mana‘o o ia i lenei olaga…”
O le augani lea Paulo mai le falepuipui ia Timoteo e vave ane. Ua faaletonu lona soifua, faatusatusa i le taimi muamua sa falepuipui ai, ua sauni e oti.
O lona manaoga e mafuta ia Timoteo. Ua vaivai, lē toe tutusa lona malosi, ua nofo toatasi. O le mea lea sa mamafa ai le alu ese o Tema, auā ua luluti ona tiga, latalata ina oti, a ua alu ese lē sa fesoasoani ia te ia. Fai mai Paulo, o Tema ua toe foi i le lalolagi.
E iai taimi e oo ai lagona faapea ia tatou e pei o Tema, faavaivai ma toe foi i le lalolagi. Ua lafoai tofi ma faapea, ua uma.
1. E oo mai le faavaivai, ona o mea e tutupu
• E iai taimi e tuua‘ia sese ai oe e nisi, ma oo ai lagona faavaivai ma manatu, ua lava lea. Ua uma le fia taumafai, e leai se isi e talitonuina oe. Pe lē amanaiaina lau tautua, foliga mai e lē faamalieina isi i lau auaunga, ona osofai lea o oe e lagona o le fa‘atu ma le faavaivai. Ua tupu le tiga ma le loto oona, ua malo mai manatu, sili ai le malolo i le fale. O le ala lea e tāua ai le faalogologo i feau e faamalosia‘u ia te oe, auā o lagona ia e tutupu i tagata uma ma taimi uma.
E lē tatau ona tatou fai ni filifiliga tāua i le taimi tatou te lagona ai le vaivai, auā o le a faalagolago i lagona tiga, poo le loto ua faamanu‘alia. Pei o le perofeta o Elia ina ua sola ma augani i le Atua ia aveese lona ola, ae faatoa uma ona fasiotia perofeta a Paala, a o lea ua liliu faafuasei lagona ina ua faavaivai, ma sese ai le tatalo ua fai.
• Poo lagona e lē amanaia oe e tagata i ni taupulega a le aiga poo le ekalesia, ma manatu ai e alu ese. Po ua maitauina foi le faigofie ona faitioina oe, ae lē manatua au galuega lelei e tele sa fai. Pe ua e toe manatu i le malosi sa tuuina atu mo le galuega, o le foai ma mea e tele sa auauna ai, ae lē amanaia lou tagata, o i foi e tutupu ai lagona faavaivai.
• O isi taimi, e oo mai lagona faavaivai, pe a faaletonu se isi sa e vaai maualuga i ai. Poo se taitai poo se faifeau ua afaina lona soifua faaleagaga, o i foi e vave ona aafia ai le toatele ma manatu ai e sili pe a tuu. Ia manatua, o loo fetalai le Tusi Paia, e fano le tagata e faatuatua i tagata. Ua silafia e le Atua, e oo lava i tagata maualuluga, e vaivai foi latou. O tagata ola. E tatau ai le faamuamua o le Atua ia tatou.
O le faavaivai e mai le tiapolo. O taimi uma tatou te faavaivai ai, e matuā fiafia ai le tiapolo, ae faanoanoa le finagalo o Iesu, ona ua tatou faalolololo i le vaivai, ae lafoai le faamalosi e ala i le faatuatua.
2. E te silafia, o loo faamanuia e le Atua le lalolagi i tagata sa mafatia, ae lei taliaina le faavaivai?
• O Mose, sa matuā mafatia i le taumafaiga o le nuu o Isaraelu. Na oo lava ina ua fai atu i le Atua, sa fanaua ea e a‘u le nuu nei? Aisea e te fai mai ai ia ou tauave lenei nuu i le nuu ua e folafolaina? Na iu lava ina faapea Mose i le Atua ia aveese lona ola. Ua oo ia Mose lagona o le faavaivai, ae viia le Atua, e lei lafoaia e Mose lona faiva na valaauina ai e le Atua.
• O Samuelu sa nafa ma Isaraelu i le vaitau faigata, ae te‘i ua o ane le nuu e mananao i so latou tupu. Ua teena e le nuu Samuelu. Ua oo i ai le faanoanoa, ae fetalai i ai le Atua, Samuelu, e lē o oe ua teena e le nuu, a o a‘u. Ua latou teena Ieova. E lei lafoai e Samuelu lona tiute ina ua tiga.
• O Ieremia e ta‘u o le perofeta tagivale. E tele atu mea tiga na oo ia Ieremia nai lo se isi lava perofeta, ma mafaufau ai e tuu lona tiute faaperofeta; sa oo lava ina taumafai e alu ese mai lona valaauina, ae fai mai lana upu; “… o avea le afioga a le Atua ma mea e faalumaina ai a‘u. Ma tauemua i aso uma. Ona ou fai atu lea, Ou te le tautauina o ia, ma ou te le toe tautala i lona suafa. A o lou loto pei se afi mumu sa iai, ua punitia i ou ivi, ua lailoa au i onosai, ua ou le mafaia lava.” (20:9)
Sa tautino Ieremia, ua uma ia ma le Atua, peitai pei se afi mumu i totonu ia te ia le faiva sa valaauina ai, e lei solomuli pe lafoai auupega o lona valaauina.
O lesona tatou te a‘oa‘o mai lenei Luitau, toe taumafai! Poo ā sese ma faaletonu, e le uma avanoa ua tuuina mai e le Atua mo tatou. Toe amata se isi amataga fou.
Faatuatuanai sese ma faaletonu, o loo tatou iai pea i le taufetuliga e tini i le lagi, pe a lē faavaivai. O Ioane Mareko sa faavaivai, ae sa toe foi ane e fesoasoani i le ausoo. (2 Timo 4:11)
Faapefea Tema? I tusitusiga a William Barkley e faapea, o Tema o le faapuupuu o Temetiu, lea sa ta‘ua e le toeaina o Ioane e faapea: “ua logolelei Temetiu e tagata uma lava.”
(3 Ioane 12) O lona uiga, sa toe iai se amataga fou o le savaliga a Tema, e ui sa faavaivai, ae sa toe taumafai. Manatua, o tagata ola faavaivai, latou te lē manumalo, o tagata manumalo, e leiloa e latou le faavaivai.
