Afai o se isi lava mea, o le toilalo i lana taaloga i le va ma Falani o se tasi lea o mea sili ona lelei ua faia e le Manu Samoa, e ese mai lana manumalo mataina ia Uelese i le vaiaso muamua atu.
Auā o lea ua iloatino ai nei le tulaga ua iai le Manu Samoa, aemaise foi o nisi o vaega e moomia ona toe silasila atili i ai auā le agai i luma aemaise le atinaeina o le lakapi i Samoa lava. Ia taliaina le faatoilaloina, e ono fanau mai ai le atoatoa mo nisi o ana taaloga i le lumanai.
Ua vaevaeina nisi o lelei ma faaletonu foi, auā e mautinoa e tulai mai ai le atoatoa mulimuli ane.
O vaega lelei i le malaga taamilo i le Atu Europa
1. Ua siitia ai le tulagasefulu sa iai agai i le tulaga valu e pei ona faailoaina nei, ma o se avanoa e mautinoa ai le agavaa tele ai mo taaloga tetele.
2. Ua aogā le faatoilaloina o Wales aemaise ai le taaloga ma Farani ua maualuga ai le vaavaai a sponsors, aemaise le tau sailia o pisinisi e lave mai i fesoasoani tau tupe.
3. Ua vaaia le tulaga mataina o le sikalamu i le laina i luma, ua ono avea ai foi e tauva i nofoaga ma taaloga tetele faavaomalo.
4. Ua iloa ai nei foi le agavaa o Tu‘ifua, Treviranus, ma Faasavalu latou te faatoilaloina ai ‘au tetele e pei o le All Blacks, faatasi ai ma nisi ‘au malolosi i lenei taaloga.
5. Mautinoa le alii ia Khan Fotualii o loo tulaga muamua i le lalolagi i le tulaga srum-half ma le alii ia Jeremy Su‘a.
Ae mo nai vaega sa faatamala laititi ai:
1. Faalē maua le avanoa e matala ai avanoa i totonu o le backs. O se vaega o le taaloga ua tatau ona saili mamao lelei alii e mafaia ona faasaoina mai le polo i le vaega lea, aemaise ai le lē avanoa o Paul Williams, a oo ina mautu lelei le midfielder e lē toe maluelue le puipui pei ona iai Jonny Leota, James Sooialo ma Faatoina Autagavaia.
2. Ua iai a tatou loka lelei tino malolosi pei o Daniel Leo ma Kane Thompsen ua mafaia ona miloina le molo. Ae ina ua lē taaalo i lea aso, sa matuā iloga ai aafiaga i le ‘au.
3. Le tulaga ia Tusi Pisi, o se alii taaalo lelei ae tele foi ona ni vaega na lē atoatoa ai lana taalo i lea aso, i lana pasi faapea ai ma le kikiina o le polo. E tele ‘ai sa tatau ona malo ai ae sa tele ina lē lelei ma sasi nisi o ana filifiliga na fai.
4. Moomia le tatau ona siitia le malolosi o le ‘au ia silia atu ma le 85% e mautinoa ai le malosi lelei i osofaiga ma le taimi atoa.
5. O le pulega a le tatou ‘au lea ua iai nei, e pei o le faiaoga ulu ia Stephen Betham, le faufautua ia Pat Lam, ma le faiga o le laina i luma, Greg Smith, o se malosiaga tele lea ua iloa ai e le lalolagi o le tomai o nei alii o loo faailoa mai i iuga o le taaloga, ae o se vaaiga i le sefulu minute mulimuli ua foliga mai ai ua foai le manumalo ia Falani.
O se tulaga lelei foi e ao ona silafia, talu nei ona tofia le susuga Fred Amoa e avea ma Ofisa Sili o le Iuni Lakapi a Samoa, ua tele suiga ma vaega lelei ua molimauina i totonu o le Iuni Lakapi.
6. O faalapotopotoga e pei o le SIFA o loo galulue vavalalata ma atunuu i fafo i faiga faapisinisi, sa tatau ona latou faaaogā le avanoa lelei lea e faalauiloa ai i latou i le Atu Europa. Na matuā faatumulia nofoaga matamata i Falani ma le UK i taimi o taaloga a le Manu Samoa, aemaise le faitau miliona o i latou sa maimoaina nei taaloga i luga o televise faasalalau, ae na misia e le Pulega a Tagata Maimoa mai fafo lena avanoa e matuā siitia ai a latou faatosinaga lelei mo Samoa. E mautinoa o le toatele o tagata o loo fiafia i le lakapi o tagata maumea, ma o le igoa Manu Samoa o se igoa ua maualuga le siitia i le taimi nei, ae sa misia e le vaega a tagata maimoa mai fafo a le tatou atunuu ona puea lena avanoa lelei. Atonu o se avanoa lelei sa tatau ona auai atu ai la tatou Tausala o le atunuu, le Miss Samoa ma se ausiva e agai atu faatasi ma le ‘au, ina ia atili faalauiloa atu Samoa i le lalolagi. Sa tatau foi i le ofisa o Samoa o loo iai i Brussels ona latou faamaopoopoina ni mea e ono mafai ai ona tosina ni kamupani ma ni pisinisi tetele i na atunuu e pei o Pale i Falani, e inivesi i lo tatou atunuu, a o matuā iloga faalalauga a le aufaasalalau i lena taimi.
O le ta‘ua o nei vala eseese ua toe aliai mai ai le faafitauli e tasi o loo avea pea ma faavaatu‘ia i le aulakapi a si o tatou atunuu, ma isi foi a tatou taaloga, o le itu lava lea i seleni.
E moomia ai lava le galulue o le tatou Iuni, auā afai o loo mafai e la atunuu tetele i le taaloga o le lakapi, e mafai foi la e Samoa mea uma ia, ma vaaia ai le agaigai i luma o lenei taaloga i le Atu Pasefika.
