Ua faamausalī se faigauo ua mafanafana – Pati & Loretta Ese

O se aso fiafia ma le tele o faamanuiaga mai tauaiga uma ma uo sa auai atu e molimauina le tuufaatasia i le faaipoipoga o le ulugalii fou, le susuga ia Pati Ese ma lana manamea, le tamaitai lalelei o Loretta Aukuso.
O se faigauo na amata mai lava a o la aooga faatasi i Marcelin High School ma e ui sa iu ina valavala ina ua faauma a la aoaoga ma ua eseese foi a la galuega, ae lei mafai ai ona toe tineia le alofa faamaoni ua uma ona totōina i o laua loto, pau o lea sa la taufai tulimataia le aso o le a aloaia ai loa le faapaiaina o a la tautoga, e iai le Aso Toonai na se‘i mavae atu nei, aso 20 Aperila, 2013.
O le alii faaipoipo, o Pati Ese o se alo faasino i le susuga Maselusi Ese e mai le afioaga o Fasitootai ma le faletua ia Lulu Ese e mai le afioaga o Salani i Falealili.
O le tamaitai faaipoipo o Loretta Aukuso, o ia o le alo ulumatua o le Tofa Tanupo Aukuso mai le afioaga o Nofoalii, ma le tina ia Nuu Luatua mai le afioaga o Saleimoa. O le alii uosili, o Shannah Tovio ma le tamaitai uosili o Pricilla Muller.
Na faia le sauniga o le faaipoipoga i le malumalu o le Ekalesia Emanuelu i Papatoetoe, sosoo ai ma le taumafataga i le Holiday Inn Airport Oaks. Na molimauina foliga fiafia ma le faamalieina o lenei ulugalii talavou, ma o moomooga o la uo uma sa auai, ina ia avea lo la aiga ma se ulugalii e ola fiafia ma tupu lauolaola lo la alofa o le tasi i le isi.
E momoli atu ai foi alofaaga ma faamanuiaga uma mo oulua Pati ma Loretta. O a matou tatalo, ina ia faamanuia tele ma faamalumalu aao alofa o le Tamā o i le lagi i luga o le lua aiga, ina ia avea oulua o se ulugalii e ui ina talavou, ae fusia i le alofa ma le faamaoni le lua mafutaga, nei seia oo i le faavavau. Alofaaga o oulua aiga uma ma uo, aemaise o lua mātua.
E momoli atu foi faamanuiaga a le Samoa Times mo le ulugalii fou.