O i latou sa faasuafaina i le suafa Tiatia ma le suafa Falevalu i Gataivai

O i latou sa faasuafaina i le suafa Tiatia ma le suafa Falevalu i Gataivai

Na logo malie i le faalogologo a i latou na faapaiaina o latou nofo i le suafa Tiatia ma le suafa Falevalu i Gataivai le faamalosi ma le luitau a le susuga i le tausi matagaluega ia Rev Tuivanu Tuivanu i le taimi sa faapaia ai nofo e faapea, o le suafa matai e lē o se pale, ae o lana tala e fai i le laau lea o le fa’i, ia sua le futi ae totō le suli, o le futi o le fa’i ua matua ua faasolo ina fai ifo, ae o suli poo tamai fa’i e totō lea auā latou te faaauauina gafa o le aiga poo le ola o le fa’i matua (futi).

O le saunoga o le ola na manava atu ai le auauna a le Atua e fai ma faamanuiaga ia i latou ua tusilima iai matai o le aiga ina ia mafai ona pale i le suafa Tiatia ma le suafa Falevalu o le aiga auā le tautuaina o tiute faamatai i totonu o aiga nuu ma ekalesia.

O le taeao o le Aso Lulu 2 o Ianuari na faataunuuina ai lea faamoemoe o le aiga i Semulimatagi i Gataivai ma sa molimauina ai le tumutumu o aiga na malaga mamao atu i atunuu i fafo e talisapaia ma talitali alofi lima le valaau a matai o loo tausia le aiga i Gataivai e ala i suafa matai mo fanau. O se agaga meemee ma le loto faafetai i suli o le aiga na auai i lea aso ona o se tofa saili mamao ma le tofa loloto i matai o lo tausia le aiga i le faasafua mai lea o le suafa mo latou fanau auā le tausia o aiga.

Rev Tuivanu Tuivanu i le taimi na faapaiaina ai nofo a le aiga i le malumalu i Gataivai

Rev Tuivanu Tuivanu i le taimi na faapaiaina ai nofo a le aiga i le malumalu i Gataivai

O le aiga o lou tofi lea mai le Atua, o le matai o measina lea a aiga. Ae o le finagalo o matai o loo tausia le aiga ua tatau ona fai ni suafa mo a latou fanau ina ia mafai ona fesoasoani i matai o loo tausia le aiga e ala i mea e fai o le aiga, tautuaina o le nuu aemaise o le Atua ma lona finagalo, ma ua alagatatau foi ona faasuafa fanau auā ua lava le tautua ma lelei galuega e tautua ai aiga ma le nuu.

E 21 i latou sa faaee iai le suafa Tiatia o le aiga ae toaono i latou sa faapaleina i le suafa Falevalu, o se taeao fou lea taeao i le ala usu o le nuu i le malumalu e molimauina le faapaiaina o le faafotu tupu o le suafa Tiatia ma le suafa Falevalu i Semulimatagi ona sosoo ai lea ma le feiloaiga o le aiga ma le nuu faapea ma malo usu i lea taeao i le momoliina lea o nofo. O le tofa ia Tiatia Ieremia sa gafa ma le fale i le momoliina lea o nofo ae o le tofa ia Tiatia Fagalulu sa peseina le folafolaina o ‘ava o nofo. Na maualuga ma matagofie le faamoemoe o le aiga ona sa tele malo usu mai le itumalo faapea le usoga a Tumua ma Pule.

O le tagata ma lona faasinomaga o le tagata foi ma lona tupuaga, o fea lava e lele iai le toloa e maau lava i le vai auā e lē galo le aiga na faafailele mai ai le olaga tautua. O le ala i le pule o le tautua, e ta’ape lava a nuu potopoto ae lē mafai lava ona faagalo le aiga moni leaga o le tofi lea mai le Atua.

O le tausaga 1998 na gata mai ai le faia o nofo i lea itu o le aiga i Semulimatagi i Gataivai ae o le tofa saili ma le utaga loloto i tamā o loo tausia le aiga i le taimi nei i le toe faia lea o ni suafa auā fanau lea ua mafua ai le toe patipatia e aiga na malaga atu i fafo ma aiga o loo aumau i Samoa lea aso sa atofaina e le aiga i Gataivai.

Sauniga o le faapaiaina o nofo

Sauniga o le faapaiaina o nofo