Ua tele tausaga ma ua tolu taamilosaga tetele o le Ipu o le Lalolagi, sa nofo pologa ai pea, ma avea le atunuu tele o Uelese ma lana aulakapi, o se kolone masani a le Manu Samoa.
O le mae’a ai o le taaloga sa faia i le faaiuga o le vaiaso, sa toe iloilo ai ia ‘au e lua, ua faato’ā mapusela leotele ai ma le Dragon a Uelese, ina ua mafai ona ia faatoilalo le Manu Samoa, talu mai se vaitaimi umi.
O se fiafiaga, ma ua faapipiina i api a Uelese le faaiuga ina ua manumalo ia Samoa. O se taaloga sa matuā popole tele foi i ai Uelese, ina ua ta le malologa o sili ‘ai o le Manu.
Peitai na sasi le vaai ma le pue a le Manu, ma lana puipui, na mafua ai ona sao ane le Tarako ma kolosi le laina, o se gaioiga sa matua suegata ia Uelese, talu ona amata le taaloga.
E ui ina ua malolo le aulakapi a le atunuu, peitai o loo tumau pea le talitonuga o le faiaoga ma le pulega a le Manu Samoa, o loo telē lava le avanoa e sao atu ai i ‘au e valu pito i luga, mo le sailia o le siamupini o lenei tausaga.
E oo lava foi i nisi iloga o le lakapi, o loo faatumauina pea lo latou talitonuga i le Manu ma lana alo faiva i isi taaloga e lua o totoe.
E tatau ona manumalo le Manu Samoa i le la taaloga ma Fiti, atoa ai ma le feiloaiga mulimuli ma le ‘au malosi a Aferika, le Springboks.
O le faafaigata o ‘au uma o loo tausinio ma Samoa, ona o ai faaopoopo, poo ponesi sa maua e ‘au i taaloga ua mavae. E ono iai ni suiga e tulai mai i le faitauina o ai ma ponesi, pe afai ae iai nisi uiga e ono tupu i taaloga mulimuli o le a faagasolo i le Pool C.
E tāua tele ma e manaia pe a manumalo le Manu Samoa ia Fiti, ma maua se ponesi, ae lē manaomia lea tulaga, pe afai e mafai ona latou faatoilalo le ‘au a Fiti, toe manumalo ia Aferika i Saute.
Ua maitauina nisi o matati’a tata’e i lenei taamilosaga, e pei o Ireland sa savavali ia Ausetalia, ma Uelese, lea ua ea le pologa i le Manu Samoa. Ua tatau ai ia Samoa, ona fai se faiga matautia ia Aferika i lenei tausaga.
E toe valaau ai i le tapuaiga a le atunuu ina ia malu pea, ma to’a le tai, aua le lagalagā ma soona vevesi, ma tuua’i le leaga i se tama taalo.
Ia faanonomanu, ma ia faatini foe mo le a’e, ua lē o toe mamao ona mae’a lea o le alo faiva o au tamafanau, e pei ona tausinio ai.
O lau tapuaiga e manuia ai, o lau tapuaiga foi e faaletonu ai le taumafai o le Manu Samoa, i faagatama o lenei tausaga ma lenei vaitaimi.
Go the MANU, ma ia manuia lou taumafai!
