E toalua ni sui o le Komiti Faafoe a SAASIA mai le Laumua i Ueligitone, ua talia a la folasaga i le mataupu o i luga, ma ua sauni atu nei e faasoa i le fonotaga faavaomalo i le Iunivesete o Samoa i Papaogalagala, ma o le Manulauti lena ua tusia i luga o lea fonotaga.
O le susuga i le Faatina o le SAASIA o Fereni Pepe Ete ma le susuga i le faiaoga o Whitireia, ae o se sui foi o le Komiti Faafoe a SAASIA o Le‘autuli‘ilagi Taotua Malaeta F. Sauvao o le a malaga atu i Samoa mo lea fono faavaomalo.
O le Gagana Samoa ma le tulaga o iai Aoga Amata i Aotearoa e saunoa i ai Fereni, a o Le‘autuli‘ilagi e faasoa i sana suesuega (research) na iloiloina ai le Taiala o le Gagana Samoa i Aoga Amata i totonu o le Laumua i Ueligitone.
E faamoemoe e tuua e ia tina Samoa le atunuu nei ma malaga atu i Samoa i le vaiaso faaiu o Aokuso ina ia auai i lea foi faalagamaea o le faaaliga o mafaufauga i soo se measina e pei ona faamanulauti ai le fono faavaomalo. E aofia ai sui o atunuu eseese mai fafo atu o Samoa, ma e talosia i le agalelei tausi mai o le Matai o Measina uma e faataunuu ai lea faamoemoe i le manuia.
E iai foi le talitonuga o le a tu‘i atu le mulipapaga e le SAASIA ma tina uma aemaise Samoa atoa i Aotearoa nei, mo nai sui o le a momolia o tatou sao mo le fono faavaomalo i Samoa i le masina fou, foi mai ma se oso matagofie o faalumaga o le tu ma aganuu a si o tatou atunuu.
