Na tulai i luma o le Faamasinoga Faaitumalo a Hastings se tama Samoa e suafa ia Uluia Muliipu e limasefululima tausaga o lona soifua ona o se moliaga e faasaga ia te ia o le faaoolima i lona tu’iina lea o le ulu o lona afafine i se poloka sima. Taua e le alii faamasino o Geoff Rea e faapea, o le aso 22 o Fepuari o le tausaga nei lava na fai ai se taugaupu a Muliipu ma lona afafine ona o le musu o le teineititi e alu i le sauniga a le Ekalesia o le Au Paia o Aso e Gata Ai. Na fofogaina i luma o le faamasinoga e faapea na fai se la tuliga faataamilo ma lona afafine i lea vai aai ma toe foi mai ai i le fale, ma ia tago ai loa i se poloka sima ma tu’i ai le ulu o lona afafine ma ta kiki ma manua ai ona foliga a o iai o ia i totonu o lona potu moe. E taunuu atu la leoleo ae faapea loa le faamatalaga a Muliipu i lona afafine, ‘ua e laki ou te lei fasiotia oe’, ma savali i totonu o le fale ta lavalava ma nuti lona ofutino ua lavatoto uma. Sa lei usitaia e lea tama le augani atu a leoleo ina ia taofia le nutiina o lona ofu ma aua le faasaina mai latou, o lea na faaaoga ai loa e leoleo le pepper spray na mafai ai ona faafilemu o ia. Sa faatopetope atu ai i le falemai i Hawkes Bay lona afafine mo ni togafitiga i ona manuaga.
I se faamatalaga a lana loia o Roger Stone e faapea na ita tele Muliipu ina ua le usitaia e lona afafine lana faatonuga e alu i le lotu, ma a e lei tupu le faalavelave i lea aso, sa lei malosi lelei o ia ma sa mafatia i ni isi o faafitauli i lona mafaufau.
O ia o se tama e mitamita i lona aiga, ma talu ai ua le usitaia e lona afafine lona manao ina ia mulimuli i lona talitonuga o ia o se tagata lotu a le ekalesia Mamona na avea ai lea ma mafuaaga o lona ita tele.
Sa aveeseina mai o ia mai se aoaoga e faaititia ai le ita ona e le ogatasi ma ona talitonuga. Na faaiu lea aso ua maua le iuga a le faamasinoga o le tuuina atu lea o Uluia Muliipu i le falepuipui mo le sefulu lua masina.
