E lua vaiaso o o‘u iai i Samoa talu ai mataupu tau fanua ma suafa a le matou aiga. Ua tele suiga ua iai i Samoa.
E manaia tele le fale fou o Faamasinoga ua iai i Samoa.
Ua ou vaai foi ua iai le faaaogā o komepiuta e faila ai faamaumauga o gafa ma fanua o aiga.
E pau lava vaega e foliga e lē o suia o le vaega foi lea e feofeoai solo ma faalavelave i taimi o faigalauga pe a mae‘a mataupu a aiga. E taumafai lava e tau faaofi atu se latou lauga o
latou sa tapuai mo le aiga, e ui lava o lae sa tafaofao solo i Apia, ma faitatala solo i mataupu a aiga.
O tatou nei e malaga atu i Niu Sila o loo tau faavasega tupe auā le totogiina o kopi o faamaumauga mai le Ofisa o Fanua ma Suafa, faapea foi le tausiga o aiga o loo malaga faatasi atu i se mataupu, aemaise foi pasese o le tapuaiga a nuu ma alaalafaga, a o latou lava o loo i Samoa mai nuu i tua, pau lava le mea o loo tulimatai mai pe fia se mea e pa‘ū atu.
O itu ia ou te talitonu ai, e ui lava o loo iai nisi o le atunuu o loo lelei le tamaoaiga, a o le toatele lava, aemaise matou mai nuu i tua, o loo iai lava le faaletonu.
O le isi foi pine o le eseese o le tulaga tau tamaoaiga ua ou vaai i ai i Samoa, o le toatele o latou o loo malaga ifo i Apia, e faatau lava ‘aiga, a lē o le faleaiga o Pinati poo le maketi e maua ai le ‘aiga taugofie, a o le isi vaega o Samoa, o loo taumamafa i faleaiga taugata e iai faleaiga o Saina poo faleaiga o faletalimalo.
O loo foliga o latou lava o loo iai galuega ma lelei totogi, o latou nei o loo lelei le tamaoaiga. A o le toatele o nuu i tua, e leai ni galuega, ma afai e lē o iai se atina‘e o galue ai, o lona uiga ua faamoemoe mai i aiga o i fafo.
A o le faalavelave lea ua tulai mai i Niu Sila, o loo faaletonu lava le tamaoaiga o le atunuu. O loo agai pea i luga le siitia o le fuainumera o tagata ua leai ni galuega.
Ua suia le tulafono e faamamafa ai e le Malo le unai o latou o loo maua penefiti ina ia o e sue galuega. Ua maualuga lava le siitia o tau o oloa ma auaunaga talu ai lava le siitaga o le GST. Ua sii foi i luga tau o le moli eletise faapea le penisini taavale.
Ma o nei faaletonu o loo aafia uma ai tatou aiga i Niu Sila. Afai e faaletonu le tamaoaiga i tatou aiga i Niu Sila, o le a faapena foi ona faaletonu le malosi e mafai ai ona tatou fesoasoani i aiga i Samoa.
E oo foi i le tau o togiga aoga o tamaiti e matuā taugata lava. Na ma o e faatau le togiga a lo‘u afafine laititi faato‘ā amata i le kolisi i lenei tausaga, ae aumai le pili e $550.
Ua oso lo‘u ita i le aoga, ona o lenei tamaititi e toatasi ae ua alu ai lenei tupe tele, e lē o se tagata matua foi, o se tamaititi faato‘ā atoa le 12 tausaga.
Afai o lenei ou te lagona le taugata o le soifuaga, a o a‘u o se tagata e feololo se totogi, faapefea la le toatele o aiga o loo faaletonu latou tupe maua, ma e lē lelei totogi o a latou galuega? Faapefea aiga, e toatele tamaiti o loo galulue e tausi ma faaaooga?
Ou fai atu i lo‘u afafine, ua matuā taugata tele lava lou togiga. Ae ui i lea, o le a ma onosai lava ma lou tina e totogi, ae e tatau lava ia te oe ona e toaga i lau aoga, ia iu lelei, ma e alu i le univesite, ma maua mai sou faailoga mo le manuia o lou lumanai. Auā afai e manuia oe i le aoga, e manuia ai foi ma‘ua ma le tatou aiga.
Na o le ioe lava le tali a si o‘u afafine ma faafetai mai, e sa‘o ua taugata tele lana togiga, a o faalogologo mai lo‘u atalii laititi ua sefulu tausaga.
E lei uma mai le faafetai a si o‘u afafine, ae faapea mai le gagu a lo‘u atalii laititi: “No offence Dad, but you said $550 for my sister’s uniform was expensive, but how much did you spend in Samoa for your family? Why did you take so much money for your family in Samoa and you’re complaining about my sister’s uniform?”
Ua ou te‘i ai i le laititi o lenei tagata, a o loo maitau lelei uma matou tala nei e fai ma la‘u malaga na alu i Samoa, ma ua ia mafai foi ona faavasega ona manatu i ia mataupu.
Ona ou taumafai loa lea e faamanino ia te ia le tāua o aiga i Samoa. A o le lagona ua ia te au, o tupulaga lalovaoa lenei o le matou aiga, e matutua a‘e nei, o le a faigata tele ia i latou ona fesoasoani i aiga i Samoa, aemaise pe afai e lē vavalalata a latou fesootaiga ma i latou o loo i Samoa.
O le isi foi afai e lagona e ia tamaiti e lē fetaui amio a aiga o loo i Samoa, o le a faapena ai foi ona maua e latou le musu e fesoasoani i ai.
Na mulimuli faapea mai lo‘u atalii: How come our Samoan families can’t help themselves? Don’t
they have jobs?
I lo‘u lava taofi, e matuā sa‘o lava fesili ua fesiligia ai a‘u e lo‘u atalii. Ua atili manino ai foi ia te au, afai e lē lelei aoga a fanau, latou te lē maua se luamanai lelei.
O maia ia tatou tauivi ma finau i lenei tausaga, ia maua e a tatou fanau le poto ma le malamalama auā so latou manuia.
