Ua aloaia i le aso le avea o Samoa ma sui o le faalapotopotoga o Fefaatauaiga Saoloto a le Lalolagi le World Trade Organisation poo le WTO.
O le avea ai o Samoa ma sui aloaia o le faalapotopotoga o le a tatala ai le avanoa o fefaatauaiga saoloto ma isi atunuu mauoloa ma malolosi o latou tamaoaiga, e le gata ina aumai oloa a ia atunuu i Samoa, ae o oloa gaosi foi mai le atunuu e faatau i ai.
O loo valoia le iai o ni suiga tetele i le itu i fefaatauaiga ma tauvaga o oloa gaosi pe a faatino le tulaga fou ua ofi i ai Samoa, ma ua valoia foi le iai o se faamāmā avega i le tau o le soifuaga mo oloa faaulufale mai i le atunuu.
O le aloaia o Samoa o se sui o le WTO o le a toe tatala ai nisi o oloa sa taofia ona toe aumai i le atunuu e pei o siusiu pipi, lea e faato‘ā aumai pe a tuanai le 12 masina talu ona ofi Samoa i le faalapotopotoga.
O le faiga fou foi ua aiaia e le toe okaina e ni kamupani tetele lea taumafa i se tulaga e faatau ai i le atunuu, ae o le a alu lava le tagata e fia tausami siusiu pipi e oka mai lana pusa i le atunuu o loo maua ai.
O Amerika Samoa o loo tele ai lea taumafa ma o le nofoaga tonu lea o le a falanai i ai oka siusiupipi a aiga i Samoa nei aemaise lava o faamomoli e aumai i le vaalele ma le vaa a lalo.