O le vaiaso atu i tua na taulamua ai le igoa o Samoa i tala faasalalau a Niu Sila ona o se tamaitai Samoa na fanau ma tiai lana pepe i totonu o le pusa lapisi a le fale-le-taua o le vaalele. Ua molia nei lea tamaitai i le tulafono a Niu Sila ona o lea solitulafono ma o loo faatalitali le faaiuga a le faamasinoga. A maua loa le iuga a le Faamasinoga, ona sosoo lea ma le faaiuga a le Ofisa o Femalaaiga a Niu Sila aua o lea tamaitai e le o se tagatanuu o Niu Sila.
O le Aso Toonai na tea nei na toe faateia ai Niu Sila i faasalalauga a le autusitala ua maliu le susuga Olo Fiti mai Otara ona ua tagatavaleina e se isi na faaaogaina ai se agaese. O le po lava o le Aso Toonai na maua ai ma molia ai se alii Samoa e 25 tausaga le matua i le fasioti tagata. Na maua e leoleo le alii ua sauni e sola ese ma Niu Sila mo Samoa. E foliga mai o se taumafaiga na fuafua lelei ma sauni i ai lenei tagata leaga.
O nei faaletonu o le a feaveai solo i faasalalauga a leitio, nusipepa ma le TV ma ta‘u leaga ai le igoa o Samoa. E le taumate o le a tele ni faasoa ma ni faasea o le a agai mai ona o nei mataupu, a o lea e feagai foi le toatele o o tatou aiga ma faaletonu i tulaga o le tamaoaiga o loo iai nei Niu Sila.
O lea ua faateteleina aafiaga o galuega ma tupe maua a tagata faigaluega ona o le faaletonu o le tamaoaiga ia Niu Sila atoa. Ua amata ona siitia le fuainumera o kamupani ma pisinisi tumaoti ua vaea tagata faigaluega ona fai mai ua le lelei tupe maua a ia pisinisi.
Ua siitia le fuainumera o tagata ua leai ni galuega, ma o nisi o lipoti e faatatau i le tamaoaiga o Niu Sila e faapea, e oo atu ia Tesema o lenei tausaga ua silia ma le 70,000 tagata o le a leai ni galuega.
Ua faafaigata ona fai nonoga tupe mai faletupe ona o faaeteetega a faletupe nei mea ane ua le mafai ona toe totogi ia nonogatupe.
Ua amata ona siitia le fuainumera o tagata ua talosagaina se fesoasoani mai matagaluega a le malo e pei o fesoasoani tau penefiti ma fale. A faagasolo la fuafuaga a le Malo e faaitiitia tupe faaalu i nei auaunaga, o lona uiga o le a tele ni aiga o le a afaina, ae o le a pito i sili ona aafia le toatele o aiga Pasefika.
Ua tatau nei ona tapega lelei le aiga ia, aua e le o mautinoa poo le a le umi o le a iai le faaletonu o le tamaoaiga o Niu Sila. O lipoiti a nisi o loo nafa ma le mataupu tau tamaoaiga fai mai, e faatoa uma faaletonu o le tamaoaiga o Niu Sila i le tausaga 2011. Ae o isi lipoti e fai mai e le mautinoa lea taofi, pau lava le tulaga mautinoa e umi se taimi o feagai Niu Sila ma faaletonu i lona tamaoaiga.
I lenei atunuu, a leai se galuega ua leai se tupe maua. Ua mou atu foi le tele o ituaiga galuega sa masani ona agai i ai o tatou tagata, e pei o falefaigaluega tetele sa i Penrose, Mt Wellington i tausaga ua mavae, faapea ma fale fasi manu sa iai i Otahuhu sa faapea ona lelei totogi o le aufaigaluega.
O le tele o galuega o loo iai o tatou tagata e le moomia ai ni faailoga mai aoga maualuluga poo se tomai faapitoa, ma e le lelei foi totogi. A faaletonu tupe maua a tagata faigaluega mai o latou totogi ua faapena foi ona faaletonu le tausiga o aiga i pili masani, tausiga o fanau aooga, faaletonu ma le saofaga o aiga i le tausiga ma le tautuaina o aiga potopoto ma le ekalesia.
O vaitaimi leaga lenei i tulaga o galuega ma tupe maua ma ua tatau ona taofi le soona faaalu ae fuafua lelei le faaaogaina o nai seleni ua maua mai.
I taimi foi faapenei, e manaomia ai le unai o fanau ina ia taumafai ia lelei aoga, ia fuafua e agai i aoga maualuluga, aua a leai ni o latou faailoga tikeri, e le lelei foi so latou lumanai pe afai o lea.
O tatou o le au matutua e tatau foi ona tatou saili avanoa mo le faaauauina o aoaoga ina ia lelei mai le tamaoaiga o Niu Sila, ae ua lava tapena tagata uma i le saili atu o avanoa i galuega e lelei totogi.
A le lelei fuafuaga a le aiga lava ia mo le foia pe faaitiitia o faafitauli ua feagai nei ma tatou uma, o lona uiga o le a tele le aafiaga i le aiga.
Ou te taofi e le o le sini lea na mafua ai ona tatou tuua aiga ma nuu i Samoa ae o mai ai i Niu Sila.
