Sa molimauina, o se isi fiafiaga sili i le tina matua ia Pepe Chan Cheuk, ina ua aulia le 95 tausaga o lona soifua, o le auai faatasi uma o ona alo, ma lona aiga faalotoifale, ae liolio e fanau o ana fanau (grandchildren), ma fanau o fanau o ana fanau (great grandchildren), i le po o le Aso Toonai na tea nei, sa faamanatuina ai se taimi umi o lana savaliga i lenei lalolagi.
Sa vaaia laufofoga fiafia, ma sa pei ua toe faafouina le loomatua ma lana soisoi ina ua tumutumu lona maota, aemaise ai ina ua ta‘u atu i ai, o le a pue lona ata e faasalalau i le Samoa Times.
Se mea ina a matagofie, o le nonofo faatasi o uso, o se manatu sa toe fafagu i lea po, ina ua maitauina uiga ma feofoofoaiga ona o le faamoemoe o le tina.
O le tina lenei, na soifua mai, ma o se tasi o ana grandchildren, sa ia laasia le tulaga o le Tausala poo le Lalelei Samoa o Niu Sila, Miss Samoa New Zealand i le tausaga 2010-2011, le tamaitai o Maree Angelika Wright. O se tasi foi lea o mitamitaga o le tina matua ona o se tasi o ona suli lea tamaitai.
O ona afioaga i Samoa, o Faleū Manono, Moamoa, Fusi Safata ma Falefa. E to‘a 16 i latou na soifua a‘e i lona laualo tulou. Ua to‘a 63 fanau o ana fanau (grandchildren), ae ua 65 fanau o fanau o ana fanau (great grandchildren).
O loo alala ma aumau nisi o ona alo i fafo atu o Niu Sila ma Samoa, i Hawaii, o Amerika, Iapani ma Ausetalia. O le faailoga o le uluola ma le faatoateleina o le aiga.
O faamanuiaga mo le atoaga o lou 95 tausaga Tina. Ia alofa le Atua ma ia toe faaopoopo nisi tausga se tele i lou soifua. O le mitamitaga o lau fanau, o fanau a au fanau, faapea ma fanau o fanau a au fanau, ina ua e aulia tausaga e tele o lou soifua. O le viiga lea o le Atua. Matou te alolofa tele mo oe le tina, Mama! Alofaaga o i matou uma lava na soifua ma tutupu a‘e, ma sa e faafaileleina i ou lava lima, seia oo mai lenei taimi, ma ua matou aeae ma fiafia ai i lenei lalolagi.
Manuia tele Mama lou aso soifua!
