O ni galuega lelei sa e faia, e lē mafai ona galo, e toatele nisi mai le alalafaga o Mulivai Safata latou te silafia le Tina ia Ana Mauga Fali Nasalio, i lana galuega fesoasoani na ia faia a’o avea o se faatosaga i Samoa i le tele o tausaga ua mavae. O lana taleni mai le Atua na ia tautua ai, o se fatu na ia totō na tuputele ma tālaulau i loto o tagata, lea ua oo mai lava i nei aso, o loo manatua pea e le toatele, alofagia ma faaaloalogia e tagata.
E faafoi ai pea le viiga i le Atua, o se agaga fiafia lea o alo ma fanau a le Tina matua ia Ana Mauga Fali Nasalio ona ua aulia mai ma le manuia esi o latou Tinā matua le 90 tausaga o lona soifua. Na soifua a’e i le alalafaga o si ona tinā i Vaiusu i le aso 13/06/1929, ae o le tele o lona soifuaga na tuputupu ae i Tafitoala Safata i le aiga o si ona tamā.
Na faaipoipo atu ia Moli Nasalio o Mulivai Safata ma aumau ai ma le fanau, o le alalafaga lea na faatinoina ai ana taleni o se faatosaga. E toa 10 le nofoaalo, 36 Grandchildren, ma Great grandchildren e 38. O le Tinā matua ia Ana o loo aumau nei i Melepone faatasi ma si ona alo ia Epati ma le faletua ia Makerita Nasalio ma le aiga.
O le soifua o lenei tina matua, e feasiasia’i i Samoa, Niu Sila ma isi vaega o Ausetalia o aumau ai le nofoaalo. O le vaitaimi o le Eseta ma le aso faapitoa mo Tinā sa mafuta mai ai i se vaega o le nofoaalo o aumau i Brisbane, ma o ni taimi taua e lē mafai ona galo i le fanau, a’o alu masina ma tausaga ae o loo vaai tino pea isi o latou Tinā ma maua le mafutaga ma ia.
Talu ai ona o loo aumau ma si ona alo ma le aiga i Melepone, o lea na fuafua ai lava e faamanatu lenei tausaga faitaulia o lona soifua i le nofoaaga o alala ma faamautu iai, lea na malaga uma ai si ana fanau e faamanatu lona aso soifua. O le fofoga o le aso o Malaefono Kamilo Nasalio o le alo lava e faasino i le Tina matua ia Ana. O se tinā tausi aiga, alofa i soo se tasi faapea lana fanau ma i latou uma na tutupu mai ia te ia. O lona soifua e lē galo isi ana fanau e pei ona faamatalaina, sa tagi i lima i le tau sailiga o le tele o seleni sa faafailele mai ai le fanau i Samoa ma Ueligitone a’o soifua mai si toeaina ia Moli Nasalio, a’o lei maliu i le tausaga e 1999.
E le faapito lona alofa ae faasafua i soo se tasi. E toatele tagata latou te silafiaina lenei Tina i Mulivai Safata i lana taleni sa ia fesoasoani ai i Tinā ma’itaga, o ia o se faatosaga. Tasi lea galuega lelei na ia faia mo tagata o le nuu na mautinoa na faamanuia iai le Atua ia te ia. O le faanaunauga o alo ma fanau ina ia alofa le Atua ma saga tului nisi tausaga i si o latou Tina matua ia Ana, foai lona malosi e mafai ai pea ona o latou mafuta ma sei faaauau pea la latou tausiga ia te ia, auā e lē mafai ona totogi a latou aitalafu i le faafaileleina o latou ua ‘ae’ae ma manuia ai.
O alofaaga e lē mafai ona mavae mo oe Tina Ana Mauga Fali Nasalio mai si au fanau ma aiga, Alofaaga auina atu ia Fainuulelei Vitale & Toalua Fali & fanau, Telesia Anae & fanau, Losalia & Johannes Fernandez & fanau Epati & Makerita Nasalio & fanau, Malaefono Kamilo & Faatamalii Nasalio & fanau, Maletina ma Timu Reupena & fanau late Eusenia & Manase & fanau late Sio Nasalio , Ana & Poseka & fanau , Rosalie & Tony Lupeamanu ma le fanau. Manuia tele le atoaga o lou 90 tausaga Ana.
