O le tina matua o Soonu-Niu Lio Tau o loo alaala i Henderson i Aukilani i Sisifo, o loo vaaia ai ma faamaonia le agalelei ma le alofa o le Atua i lona soifua.
O le taleni ma lana galuega masani e fiafia i ai, o le suisui ma ua atoa nei le 83 tausaga o lona soifua ae o loo faia pea lava lea galuega.
O le tasi o itu matautia sa vaaia ma faamaonia e le sui o le Samoa Times ina ua taunuu i ai ma feiloai i le tina i lona maota, ona o loo faia uma galuega suisui e aunoa ma se matatioata, ae lē gata i lea o ana suisuiga uma e faaaogā ai le nila pe suilima uma foi e pei ona ta‘ua i le gagana suisui.
E maofa ona o le matua ua oo i ai, peitai o le tui o le nila ma le pito filo, atoa ai ma le faataunuuina o le galuega atoa se‘i oo ina mae‘a, e leai ma se tautoai pe faaletonu, ae pei lava o lo tumau lona talavou. O lana gaioi ma lana silasila o loo tumau pea le lelei, ma le manino e lē taumateina.
E le gata i le faatinoina o lana galuega suisui, ae faapea foi le tele o feau i totonu o le fale. E kuka, e sauni lava foi e ia ana mea tausami, e pei o le mālūtaeao, ma taumafataga i le aoauli.
E faamālū foi na o ia, ma isi lava feau masani i totonu o le fale ma fafo. O le malosi o le tina ma ana galuega faatino, e lē o manaomia ai se isi e fesoasoani mo ia i aso uma lava.
O le molimau a si ana tama teine o loo la mafuta, le tamaitai o Loraeene Lio, sa ia ta‘ua ai le faafetaia o le alofa o le Atua i lona tina, ona o le faatinoina o tulaga masani o le olaga i lona lava malosi.
O le la mafutaga e fesoasoani lava i ai i mea uma, aemaise lava ona manaoga faapitoa, peitai o le tele o taimi e tuua ai na o ia, ona o lana aoga ma lana galuega.
O taimi uma lava e toesea ai, o taimi foi ia e galue malosi ai le loomatua i le faatinoina o tiute masani, e oo lava i le tapenaina o le fale.
O se ata mautinoa lea lava o se tina e mafai lava ona soifua na o ia ma lona malosi o loo iai nei.
O le molimau foi lena a le faletua ia Lisa Samuela, sa iai faatasi ma le tina ma lona alo i le aso o lenei feiloaiga, ma o se tasi o tauaiga o le tina matua, o loo tele ina mafuta vavalata i ai ma fesoasoani i le tausiga o le tina.
Ta‘ua e Lisa, o le tele o taimi e lē faatali le loomatua i se tasi e oo atu e fai se mea poo se galuega mo ia.
Ma e iai lo latou talitonuga, o le atili foi lea ona faatupulaia lona malosi, ona e lē o se loomatua e nofonofo, ae fiafia e tu i luga ma faagaioi lona tino i nai ana feau lava ma ana mea e fai i totonu o lona fale, aemaise lava la i lana galuega o loo fiafia tele i ai, o le suisui lima o mea.
Sa molimauina foi i lea aso le tele ma le anoanoai o galuega a le tina matua i ana suisuiga. O ofu o tamaiti ma laei o tagata matutua e faatinoina uma lava i le auala e pei ona ta‘ua.
O le nila lava ma le filo lava e aunoa ma se laau suisui e pei ona faaaogāina e le toatele.
Afioaga/Aiga/Taleni
Na soifua a‘e i Aalamagoto i Apia, ma Faleasiu i Aana, a o ona tuaaa o Mau Wong ma Palasi Tumalu. O le galuega ma le taleni suisui, sa ia a‘oa‘oina ma i lona tina, sosoo mai ai ma ona uso.
O se aiga suisui lona aiga, ma oloo faaauaua pea e lenei tina matua le taleni ma le mealaofa a le Atua sa soifua mai ma lona aiga.
E toaono ona alo, ae ua 19 fanau o ana fanau, (grandchildren) ma le toa 12 o fanau o fanau o ana fanau (great grandchildren).
Ua maliu le tama o le aiga, o ona alo foi e toaono ua maliliu le toatolu ae o loo soifua pea le isi toatolu.
Pesamino e matua ua ono sefulu ona tausaga, sosoo ai ma Palasi ua maliu.
O Maletina na maliu i le vaiaso talu ai, o le taimi tonu foi lea na faia ai lenei talanoaga. O le tama ia Kikoe o loo alaala i le motu i Tutuila, o Tavita o loo i Aukilani ma le alii o Bob ua maliu foi.
O le tasi o ona grandson o le susuga ia Konelio Tali, o loo faifeau ma lona faletua i Perth i Ausetalia e oo mai lava i le taimi nei. O le susuga ia Rev Konelio, o lona soifua sa papalu lava i aoao ma lima o le loo matua. O le tamaitai o Loraeene Lio o loo la mafuta pea ma le tina matua, o le isi foi lea ana tama sa fai mai lava i lona itiiti.
O le tamaitai o Loraeene ua taulimaina le faailoga o le BA mai le AUT Aukilani, ae o loo faaauau pea aoaoga mo le Diploma in Business i le AUT lava. O ia foi lea o loo faigaluega, aoga, ma nafa foi ma le tausia ma le vaaia o lona tina matua.
O se fiafiaga i totonu lenei aiga, le mafuta pea ma le tina a o maua le malosi, aemaise ai o le vaaia pea i ona foliga ma lona soifua i aso taitasi o le alofa faasoasoa o le Tama i le Lagi.
O loo feagai nei le tima matua ma le aiga atoa, ma le ao pogisa ona o le valaau a le Atua i se tasi o alo, a o se tina foi o le aiga.
E faamaise atu ai foi le galuega nei i le tina, ma le fanau ma le aiga atoa uma lava, ona o le malaga lē faatuaoia a le maliu e pei ona afea ai le aiga i lenei vaitaimi o le tausaga.
