Tuvaelua A‘eau Peniamina i le gagana a tusitala

O le gagana o loo faaaogā e nisi o tusitala o nusipepa i Samoa e faamatala ma momoli ai mau a le Itu agai pe a folasia ni mataupu i fonotaga e aumai ai le valaau i le au faasalalau o leitio, televise ma nusipepa, ua atugalu ai le sui taitai o le Itu agai, o se toe ulutaia ma o se sui sinia foi o le Palemene.

O le ulutala a se tasi o nusipepa na faamatala ai se finagalo o se faipisinisi falemaliu i Savaii le afioga Pa‘u Sefo na ta‘ua ai, o le lotoleaga o le taitai o le Itu agai le mafuaaga o le finau e toe tatala le falemaliu i Tuasivi ona e taugata le totogi o le falemaliu e lē gafatia e tagata lima vaivai.

Na sii i luga e A‘eau le nusipepa ma faaali ane i tusitala le lipoti sa tusia i le gagana Samoa. “Silasila outou i le ulutala lea ae o totonu atoa o le faamatalaga o le lipoti e leai ma se faamatalaga a Pa‘u o ta‘ua ai se lotoleaga”.

Fai mai le sui taitai o ituaiga o tusitusiga faapea e faamamasagia ai le tulaga o le taitai o le Itu agai ona e foliga e faaopoopo e le tusitala faamatalaga e lei faia e le tagata na faatalanoa mo le lipoti.

“Ou te lē fai atu nei o se lē fiafia, ae o se tuualalo ma se fautuaga ia te outou, ae tāua tele le tou galuega, ma e manaomia tele le tou lagolago mai i le momoliina o le matou mau’.

O le fautuaga a le sui taitai na faaali ai se lagona o se tasi o tusitala sinia i le sui taitai ma faamalulu pe afai ua lagomia ai se finagalo i le tusitusiga, aemaise o le faaupuina o le ulutala a le nusipepa.

Ae sa faailoa e le tusitala e lagolagoina tele le mau a le itu agai peitai e lē noatia ai le au faigaluega o nusipepa ma televise faapea leitio i le faia o le latou pitolaau e aunoa ma le aiāina e ni faiga faapolokiki.

O loo iai le talitonuga e atagia foi i nisi o saunoaga a faipule o le Itu agai pe a feiloai ma tusitala i nisi o fonotaga, le faanoanoa i le tauaveina e se tasi o fale televise o loo lisiina fale ma fanua o le Malo e faagaioia ai.

O le faanoanoaga e mafua i le ave uma e le taitai o le Malo o se avanoa e tali ai i ni mataupu e laga e le Tautua Samoa, ae itiiti le avanoa e maua e le Itu agai.

O le tele foi o mataupu e folasia e le Itu agai, e lē faaaogāina uma i lipoti a le au faasalalau ma o le latou lea faitalia e filifili ai poo ā tonu mataupu e tāua ma ‘anoa e tatau ona silafia e tagata lautele.

Faaalia e se tusitala sinia e lē faapea o mataupu uma e folasia i se feiloaiga ma tusitala e faasalalau e nusipepa, leitio ma TV. “E iai mataupu tāua ae e iai mataupu e lē tāua, aemaise o ni mataupu ua uma ona folasia muamua ae toe faaaogā e le au faipolokiki le isi avanoa e toe faalauiloa mai ai.”