O le Aso Sa muamua o le masina o Aperila, na taliu mai ai le faamalologa masani mo le tolu masina a le Susuga i le Faafeagaiga o le ekalesia EFKS Pine Rivers, le susuga ia Rev Tapenaga ma le faleuta ia Olita. Na faatali atu foi le ekalesia Pine River i le taliu mai o le faigamalologa a le latou faafeagaiga ma feiloai ma le agaga fiafia.
Ina ua mae’a sauniga masani o le Aso Sa, na folasia ai loa e le ekalesia lo latou manaoga i luma o le latou faifeau. O lea manaoga o le ekalesia, sa fefulisa’i i ai le uta ma le moe i le aulotu a’o toesea le susuga i le Faafeagaiga ma le faletua i le la faigamalologa.
O le finagalo autasi o le ekalesia, ua manatu o le a solomuli ese mai le ekalesia EFKS sa faamalu ai la latou tautua mo le Atua, ae tu toatasi. O le faaiuga a le aulotu e solomuli ese mai le EFKS, e afua mai i nisi o mataupu sa lē fiafia ai le aulotu i le va ma le ekalesia aoao, le EFKS. O ia mataupu, e lei finagalo le aulotu Pine Rivers e faalauaitele pe finauina foi. Ae o le faaiuga ua faia e latou ina ia maua ai le filemu, o le faamavae lea mai le EFKS. E pei ona saunoa iai le fofoga o le ekalesia le susuga ia Lemalu Tana Seuao.
E lē o se faaiuga faigofie i le ekalesia a Pine Rivers, o se faaiuga na fai ma le loto nutimomoia, ona o le alofa i le mafutaga lelei ma si o latou faifeau le Susuga ia Tapenaga ma le Faletua, e leai se ila o le faifeau ma le faleuta i le va ma le ekalesia, e pele i le ekalesia le latou Faafeagaiga, peitai, ua augata le agaga tautua ma le agaga tapuai o le aulotu i lalo o le faamalu a le EFKS. O le alofa o le aulotu i le latou Faafeagaiga na faaoloolo maau ai io latou mātua faaleagaga, ina ia faaauau pea ona avea i laua ma o latou mātua faaleagaga o se ekalesia tutoatasi.
E lē o se faaiuga e faigofie i le Susuga ia Rev Tapenaga ma le Faletua, atonu ua vaeluaina o la loto, i le alofa i le aulotu sa galulue ai ae o laua o le auauna a le Atua i lalo o le EFKS.
O le tali a le Faifeau, na ia fola manino ai, e leai sona manatu e faalavelave i le faaiuga autasi a le ekalesia, peitai, mo laua ma le aiga o le a faatali i le lagi mo se faasinomaga.
Ua mae’a ona uia ala o mea e tatau ona faatino e le ekalesia Pine Rivers, auā le faamuta aloa’iaina o le latou tautua i lalo o le EFKS. Ua mae’a ona tatala le feagaiga ma le latou Faifeau ma le Faletua, ua faapea foi ona tuuina atu le latou tusi faamavae i le susuga i le Toeaina Faatonu o le Matagaluega EFKS Kuiniselani faapea foi le pulega a Kuiniselani i Matu sa galulue ai.
I se feiloagia ma le susuga i le faifeau ia Rev Tapenaga Reupena na saunoa ai le susuga i le faafeagaiga, e leai sona loto e faia, e tuu lava i le faitalia ma le mea ua malilie i ai le ekalesia, e leai foi sona faamoemoe e faalavelave i le mea ua iai le finagalo autasi o le aulotu, peitai, o latou ma le faletua ma le nofoaalo o le a tatalo pea i le Atua e faasino mai se mea e ao ona fai ona e tumau pea lona fia tautua i le EFKS.
I le tutoatasi ai o le aulotu a Pine Rivers, na matala ai ma le faitoto’a e faatasi atu ai i lalo o le faamalu a le Ekalesia EFKSA. O loo ta’ita’ia e le Susuga ia Rev Kerita Reupena ma le faletua ia Binary Reupena.
O le tausaga e 2016 na tutoatasi ai le ekalesia a le susuga ia Rev Kerita ma le faletua ia Binary Reupena ina ua see ese mai le faamalu o le EFKS, e afua mai i ni to’atuga na tulai mai i le va ma le ekalesia aoao, poo le EFKS, ma resitala ai loa le ekalesia fou ua faaigoaina nei o le EFKSA poo le Ekalesia Faapotopotoga Kerisiano Samoa Ausetalia.
O le Aso Sa aso 6 o Me, o le uluai faatasiga lea na mafuta mai ai le ekalesia a Pine Rivers ma le EFKSA Ipswich. O le susuga i le faafeagaiga ia Rev Kerita na ta’ita’ia le sauniga o le faamanatuga o lea Aso Sa, ona see atu lea i le hall mo le taumafataga. O le uluai toonai foi lea a le falelua EFKSA Ipswich ma le EFKSA Pine Rivers.
O le ekalesia a Pine Rivers ua tausia nei e le A’oa’o Fesoasoani Susuga ia Tupai Palea ma le faletua ia Lau Palea.
O le Failautusi o le afioga ia Lemalu Tana Seuao. E faia lava sauniga masani a le ekalesia i Aso Sa ma fai lava a latou galuega se’i vagana Aso Sa o le Faamanatuga e faataunuuina e le susuga ia Rev Kerita Reupena. Ua iai le faamoemoe o le a faia ni taaloga tuufaatasi i le faaiuga o le tausaga e faamautu ai le masaniga a ekalesia e lua.
E 20 matafale galulue o le aulotu a le susuga ia Rev Kerita ma le faletua ia Binary Reupena e lē o aofia ai aiga fesoasoani.
O le failautusi o le susuga ia Ofagamalefa Tipi Tisema. O se ekalesia ua mautu lona nofoaga, o le malumalu tapuai faapea le hall o le maota o le galuega ua mautu lelei mo le tautuaina o le Atua ma lona finagalo.
