“O se taitai e loloto tele lana tofa ma o se tamalii na tulai mai i le vaitau o le lē mautonu o upufai o malo ae na manino lava faamaumauga a le Palemene a o i le tofi Fofoga Fetalai Nonumalo, e lē o se tagata na soona faia ni ana faaiuga faavavave e faatatau i suiga e tele i lona faato‘ā tulai mai ai i le taitaiga o le Maota,” o se saunoaga lea a le Fofoga Fetalai o loo iai nei, le Afioga Tolofuaivalelei Falemoe Leiataua e faatatau i le Afioga Nonumalo Aiono Nanai Sofara, i le tuumalo ai o lenei taitai iloga o Samoa.
O le Afioga Nonumalo Sofara e pei ona silafia ai e le toatele o le atunuu a o avea o ia ma taitai o le Malo o Samoa, o le uluai Fofoga Fetalai lea a le Faigamalo e Puipuia Aiā Tatau a le Atunuu le HRPP.
E fa paeaiga o le Palemene o Samoa na tautua ai lenei auauna i le tofi Faipule o le Itumalo Faaalaalafaga o Aana Alofi Numera Muamua ma le Itumalo faaalalafaga o Sagaga Le Falefa.
O le tausaga e 1979 na uluai ulufale ai Nonumalo Sofara i le Palemene ae o le tausaga e 1982-1984 ma le isi paeaiga na sosoo ai i le 1987-1989 na tulai mai ai loa o le Fofoga Fetalai o le Palemene ina ua tulai mai ai foi ma le Vaega faaupufai o le HRPP i le foe o le Malo o Samoa.
E lē mafai ona faagalo e le toatele o taitai o Samoa lenei tamalii ona o se tagata e oa i le gagana aemaise ai lona faafoega o fono a le Fono Faitulafono i Tiafau.
“O le vaiatu tonu lea na tulai mai ai le afioga i le Tama a le Malo ma le Laau na Fausia i lenei tofiga, na faatolu ai lava ona sui taitai o le Atunuu i le paeaiga e tasi, ma e ui i ia lē mautonu i taitaiga o le atunuu i lea vaitau ae na to‘a lava le Afioga Nonumalo ma o ni suiga tetele ia na matuā iloga ai ona tofotofoina le tofa a lenei tamalii i lona taitaiga o le Palemene”, o se faamatalaga lea a le afioga Tolofuaivalelei Falemoe Leiataua.
O se tamā foi ua ta‘ua e lona aiga e fiafia tele i faafiafiaga faa-Samoa ma mafutaga faaleaiga. O le tele o ona taimi mulimuli na molimauina ai le atinae o le tomai faafatupese ma faatusipese e pei ona iai se fatuga e faatatau i le Ao Mamalu o le Malo ua tuanai atu, le Susuga Malietoa Tanumafili II. O se vii e faafetaia ai le tautua a le susuga i le Ao o le Malo o le tamā o Samoa mai i le amata mai ai o le Malo Tutoatasi seia oo i le Mileniuma fou i le tausaga e 2000.
Atonu o lona tomai lea o loo vaaia foi i ē ua tupuga mai ia te ia e pei ona iai se tasi o ona alo, le faletua ia Vini Peteru ma lona alii, le susuga i le faafeagaiga, Rev. Lale Peteru ma o la alo, ua lauiloa i le aufaipese o le Punialavaa.
E lē gata i lea o se tamā e malosi tele i le lotu. Sa tautua o ia i le Ekalesia Faapotopotoga Kerisiano Samoa i le tofiga A‘oa‘o Fesoasoani ma e malosi foi lana lagolago e pei ona ta‘ua e ona alo i le Ekalesia Katoliko.
Faaalia e lona alo ia Aleni Sofara, o se tamā e fiafia tele e mafuta i lana fanau ma fanau a lana fanau, ma o le tuumalo ai o lenei taitai iloga o Samoa ua ta‘ua e Aleni Sofara, o le a matuā misia e lona aiga aemaise i latou na mafuta ma latalata i le Afioga Nonumalo.
Sa faaipoipo atu lenei tamā i le faletua ia Eni Sofara, se tasi foi o taitai iloga i le itu tau i faasalalauga, ma e maliu Nonumalo e toafitu ona alo, to‘a 29 alo o ona alo ma le isi augatupulaga e sosoo ane ai e to‘a 14.
