E talanoaina loa atina‘e o Tamaitai o Samoa mai i lona tau amata mai, e lē asa lava ma le laga ai o le suafa o le tina ia Rita Tamasese, o se tina na lotolotoi ai i le taumafaiga mai e faavae le Fono Aoao a Tina o Samoa. E vevesi fuafuaga o lea taumafaiga ua avea lea tina o se Masiofo.
O le tausi tupu poo le tausi alii i lana Afioga ia Tupua Tamasese Lealofi IV. Sa mulimuli ane tulai mai lona alii i le tofi Palemia o Samoa.
O le Palemia lona lua lea o le Malo Tutoatasi o Samoa ina ua tuua le Malo e le uluai Palemia, le Afioga Fiame Mataafa Faumuina Mulinuu II.
O le molimau a le fanau, e lei faigofie tiute o le Afioga i le Masiofo ia Rita Tamasese. Ua aofai faatasi ona tiute o le Tina, o le toalua, o le uso, o le tausi soifua ma le Masiofo.
O ona uiga “toafimalie” e pei ona molimau i ai se tasi o ona alo, le Afioga Taimalie Kiwi Tamasese, o le sui o le fanau i toe sauniga o le Afioga i le Masiofo, na mafua mai i ona tiute nei ma lona tuputupu a‘e ai o se tamaitai Samoa e tu malosi i ona tiute faatamaitai ma o le ā lava le vevesi e ono tulai mai aemaise o faafitauli i le fanau, na ta‘ua e Taimalie Kiwi, e to‘a lava lo latou tina. E filemu lava e leai se vevesi solo.
“E tele lava ina toesea lo matou tamā ona o ona tiute faale-Malo ae e nofo lava lo matou tina i le aiga ma feagai ma le tautuaina o le nofo.
E ese le faigata o le tautuaina o le Suafa Tupua,” o se faaaliga lea a lenei tamaitai i le molimau a le fanau. “Ae e leai se mea e faaletonu i le tautuaina o le aiga tele o lo matou tamā. E fai lava aiga o lo‘u tina i ai, e ‘aua ne‘i nofo ia Lealofi leaga o se aiga e telē ae o le alofa o lo matou tina i lo matou tamā na faaipoipo ai lava i ai ma amata loa le tautua”.
Na toe tepa lenei tamaitai i taimi o le tumutumu atu o tagata e lē gata i le aiga o Tupua Tamasese Lealofi IV i lo latou aiga, faatasi ai ma ta‘ita‘i o Malo mai i fafo, ma o inā na ta‘ua e Taimalie Kiwi, e titino ai le talimalo a lo latou tina.
O se faataitaiga na ia faaalia ai le asiasiga a le Tupu Tamaitai o Maori i Samoa ma na vavao lava e lona tina e nonofo mo nisi aso ona e lei taitai lava le umi o le latou asiasiga i Samoa.
O se taligamalo na umi se taimi ma ni tausaga o amanaia pea e le Tupu Tamaitai o Maori ma faapea ai ona faaauau i tausaga e tele mulimuli ane.
“A taunuu mai ni faaaloaloga e tulai ma fai le tiute o le faasoa ma e alu ai lava e faasoa faaaloaloga nei i aiga o le matou tamā”. O Rita Tamasese na soifua mai ia Mati o le tausaga e 1928 ae o le faaiuga o Ianuari o le tausaga lenei na amia ai e le Atua lana auauna.
Na a‘oa‘oina o ia i le Aoga a Malifa ma faasolo sa‘o ai loa i le aoga a Tausi Soifua. E toavalu o la alo ma fanau a fanau e to‘a 32. O ona uiga maualalo ma le osi aiga na tele i ai ni molimau.
“O se tina alofa, e lē ta‘ua lava ni sese ma ni faalogo gata a matou nei le fanau i lo matou tamā,” o se molimau lea a Taimalie Kiwi.
“Ae na te lē talia uiga lē taupulea”. I le atina‘e o tamaitai o Samoa na manatua ai “… le la‘uina o le piliki ma maa auā le fausia o le Maota o Tina i Matafele” – o se faailoga e lē tau sasalua lava ona tofiga faa-Masiofo auā o Masiofo na o latou taitaia le Mafutaga i lea vaitau ma le lagolago a Tina o loo faauluulu i ai Komiti i afioaga eseese o Samoa.
I lona tautua ai o se Peresitene o le Ituaiga Sagata Ana i mafutaga a tina o le Ekalesia Katoliko, na manatua ai “… le fealuai solo e saili fesoasoani ma fausia tane vai i vaega o le atunuu e lei oo i ai le suavai”.
O lona soifua tautua i soo se vaega o le atunuu na ofi atu i ai, na ta‘ua ai e le fanau e iai se igoa faapitoa na valaau ai lo latou tina e le Afioga Tupua Tamasese Lealofi IV. “A sau lo matou tamā i isi aso, e lei foi mai lava lo matou tina i le faatinoga o ona tiute ona faapea lea – E lei sau lava le Volunteer a le tatou aiga?” O uiga nei o lea auauna na molimau i ai ta‘ita‘i o le Ekalesia e lē gata i le Katoliko a o isi foi tapuaiga Kerisiano.
O lona soifua auauna i le lotu na ta‘ua e lona aiga e tusa ma le 95 pasene o lona soifua na taulai i galuega atia‘e a le Atua.
E maliu nei e lei umi ona alu ese mai i le aufaipese a le Matagaluega Katoliko i Vaivase ma ua iai foi ana taulaga paia e ala i nisi o ona alo ua tautua faafaifeau i le EFKS aemaise le Ekalesia Katoliko.
E ui lava la i le tele o ona tiute, na ta‘ua e Taimalie Kiwi, e lei aveese ai ona tiute faatina ia i latou ma e manatua ai foi taimi e mafai ai ona malaga lo latou tina i malaga faalemalo i atunuu mamao ae tuu lona tamā, o Tali Mogeheiki, o se tamalii Niue e leleo ma le Fanau.
“E foi mai loa lo matou tina muamua lava fesili i lona tamā i le lipoti o le faamuli ma e lologo lava o matou taliga poo le ā le lipoti o le a fai.
E amata loa ona talanoa faa-Niue ona matou iloa loa foi lea ua fai sa‘o lava le lipoti i ni faalogogata na fai”.
O le mau tauave a le fanau mai i lenei tina na ta‘ua e Taimalie, o le unai lea o i latou ina ia lagona le agaga faafetai ona o foai ua maua ma faamanuiaga i aso uma o lo latou ola.
O le auga foi lea o le molimau e faamavae atu ai i lenei tina e pei ona ta‘ua e le fanau, o le agaga faafetai, i le meaalofa ua ala mai i lenei ta‘ita‘i iloga o le atunuu ua mafai ai ona molimauina se soifua aogā i le tuputupu a‘e ai o lona aiga, o lana ekalesia aemaise o lona Malo.
O le Afioga Mamalu i le Ao o le Malo, Tupua Tamasese Efi ma lana Masiofo, o le Afioga i le Sui o le Fono o Sui Tofia ma lana Masiofo, o le Taitaifono o Ekalesia Soofaatasi ma lona Faletua, o le Fofoga Fetalai ma lona Faletua, Sui o le Kapeneta, ma le Palemene ua faataape nei, atoa ai ta‘ita‘i o Ekalesia eseese na fai sauniga faatasi ma le mamalu o Aiga, Uo ma sui eseese o le atunuu e faamavae atu i lenei tina, le Afioga Rita Tupua Tamasese Lealofi IV seia oo ina lagomau i le faaiuga o le vaiaso i lona Maota i Vaivase-tai.
