Tuumalo le lupe faalele susuga i le toeaina, Oikirisi Isaako Tuia

“E maliliu toa ua maumau ai a‘upega o le taua, ae amuia foi lea auauna e valaau lona matai o loo galue pea ma le punouai i le galuega a le Atua”.

Ua tatala e le oti le feagaiga a le ekalesia EFKS i Vaisala Savaii ma lo latou faafeagaiga le susuga Oikirisi Isaako Tuia, ua lata i le 20 tausaga o galulue ma le faletua o Ianeta Tuia i le tausiga o le lafu mamoe i lea itu o Samoa i le motu tele o Salafai.

O le faaiuga o le vaiaso nei, Aso Faraile 20 o Aukuso 2010 o le a faia ai ona toe sauniga i lana ekalesia sa galulue ai ma lagomau ai lava i le EFKS i Vaisala.

O loimata o le faanoanoa na ufitia ai le tapuaiga a le ekalesia ma le afioaga o Vaisala ina ua logotala i le tuumalo o le susuga i le toeaina a o faataotolia i le maota gasegase o Tupua Tamasese Meaole i Motootua, ina ua faamanavaina e le Atua ana galuega i le afiafi o le Aso Tofi, 5 o Aukuso 2010 i le tusa o le fitu i le afiafi.
E maliu le susuga Oikirisi ua 51 tausaga o lona soifua ma o ia o se alo e faasino i le susuga i le faifeau EFKS ua maliu, susuga Isaako Tuia ma le faletua o Malelega sa tausia le EFKS i Sapapalii i Savaii.

O ia o le ulumatua o le fanau e toalima ma o le 41 o ona tausaga na avea ai ma Toeaina o le Pulega a le Itu Asau mai Vaisala e oo i Tufutafoe lea o loo iai i totonu aulotu e valu a le Ekalesia Faapotopotoga Kerisiano Samoa.

O ia o se tasi o faafeagaiga sa faamatua i tumu i tonufai ma tiute tauave a le Pulega a le Itu Asau, ma o ona uiga tausaafia e faigata ona faagalo i mafaufau o faafeagaiga o le pulega aemaise o le ekalesia i Vaisala. E lei tuu aunoa le siiga gasegase a le toeaina ma le faletua ona sa malaga mai nisi o matai e tapuaia lona gasegase, seia oo lava ina faamuta lona soifua o loo ai le tapuaiga a le nuu ma le ekalesia. Ia faamaise le Atua i aiga ma paolo faapea uo ma aumeamamae a le faifeau toeaina ona o le valaau paia ua tatala ai le mafutaga i le ola nei. O upu a le Tusi amuia e faanoanoa auā e faamafanafanaina i latou.

O le Aso Lulu o le vaiaso nei na faia ai lona sauniga faaleaiga i le maota maliu o Ligaliga, ona molimoli ai lea i lana ekalesia i Vaisala i le Aso Tofi, sosoo ai ma ona toe sauniga i le Aso Faraile o le vaiaso nei.