Ua lagona le leo i Rama ma ua gasetoto ai le masina ina ua gausia le poutū malosi.
Ua goto le fetu o le‘apai ma ua faamānavaina galuega a se tasi o toe ulutaia o le atunuu, le afioga i le laau na fausia ia Misa Auimatagi Iosia Misa, i le Maota gasegase o le QE 2 i Brisbane nei, i le Aso Gafua, aso 15 o Aukuso 2011.
E tuumalo le afioga ia misa ua toe lava o ni nai vaiaso atoa lona 78 tausaga (29/9/1933) aso soifua. “Ua lagia nei le maota i Nefunefu e afio ai le afioga i le Laau-na-fausia, le afioga ia Misa”.
Ua usuia le fono i le afioga ia Misa Auimatagi Iosia Misa. O le lagia lava lea o le maota i Matamatanonofo e afio ai le Tama a Aiga Tuimalealiifano.
O lagi lava ia e faasino i le Falefitu o le Atitagaloa. O le paia lava lea i le aiga Tauaana ma le latou tama, Galuefa ma le Tula o Salogo, Tagata o le vavau ma upu ia Falelatai.
O le lāgia foi lea o le maota i Malie ma Vaitoelau e susū ai le susuga i le Tapaau faasisina, o le paia lava lea i le susuga i le Malietoa, na faalogo i ai Samoa, afio mai Maualaivao ma le aiga sa Maualaivao, afio mai le matua o Faamausili, susū mai Seiuli o le alo o Malietoa, Afio mai le Foialii, pou e fitu o le fale o Malietoa ma le mamalu o le fetalaiga ia Auimatagi.
O le afioga ia Misa Auimatagi Misa na faaipoipo atu ia Tavaimanuri Peretita Fitisemanu o Malie, ma e toaono (6) le nofoaalo, (Siliga Misa, Gasetoto le la Si‘a, Misa Uili Losi, Ema Misa Puletiuatoa, Taaloloomalo Anae ma Papalii Allan Misa). O ona sauniga faaleaiga sa faia i le Aso Sa, 21 o Aukuso i le Malumalu o le susuga i le Toeaina ia Rev Tauaaga & faletua ia Senerita Mataafa, Ekalesia EFKS i Southwest i Acacia Ridge.
Sa taitaia le sauniga e le susuga ia Rev Makisua Reupena. O le faafeagaiga ia Rev Petaia Tu’ifao sa feagai ma le upu faamafanafana, auā le nofoaalo ma le aiga faanoanoa.
O ona toe sauniga faaiu sa faataunuuina lea i le Aso Gafua 22 o Aukuso i le malumalu lava lea i le 10 i le taeao.
O le susuga i le Toeaina ia Rev Lauie Lupematasila sa taitaia le sauniga, susuga ia Rev Lance Tautiepa sa fofogaina le Afioga Paia a le Atua, faapea talosaga sa molimolia e le susuga ia Rev Aofaiga Levi, ma le lauga sa feagai ma le failautusi ole Matagaluega EFKS Kuiniselani, le susuga ia Rev Milo Faaleava.
O loo lagomau nei o ia i lona nofoaga tumau i le fanua maliu i Beenleigh agleby i le nofoaga o lagomau ai si ona faletua.
O le susuga i le A‘oa’ o ia Tuiloma Lavea Fiu Puletiuatoa sa fai ma fofoga o ‘aiga na lua e faatautaia le aso ma feagai ma le taliga o aiga ma paolo.
O le lupe faalele a le aiga o loo tausi nuu ile Ekalesia EFKS Grey Lynn Niu Sila, susuga ia Rev Misa Willy Losi Misa sa tu i le tootoo e lauga faafetai auā auauna paia a le Atua faapea le mamalu ma le paia o Samoa na potopoto sa molimauina toe taimi o le tamā matua, le afioga ia Misa Auimatagi Iosia Misa.
Faamaise le Atua i le nofoaalo ma aiga loto faavauvau!
