Tuumalo Ipu Polataivao Fosi-Schmidt

O nisi ia o vaega o saafiafiga sa to manatu ma molimoli ai manaoga ma alofaaga faamavae o  aiga, uo ma ē masani aemaise o alo ma fanau a le tina matua ia Ipu Anae Taeoalii Polataivao Fosi-Schmidt poo le afioga ia Fuimaono Puletiuatoa Ipuniuesea Anae Taeoalii Polataivao Fosi-Schmidt.

Na saili togafiti mai le faletua ia Ipu mai i le amataga o le tausaga nei, seia oo lava ina amia o ia e lona Matai, a o faataotolia ai i le maota gasegase i Middlemore i le Aso Toonai 8 Tesema 2012.

O ia o se tina sa matuā iloga foi lana tautua i si o tatou atunuu o Samoa aemaise o atinae tau tina ma tamaitai faapea mafutaga tatalo ma polokalame faaleaganuu sa ia fitāituga ai. Aemaise foi o lona soifua sailimalo sa faapea ona avea ai o ia o se tasi sa utuvai mai ai le tele o tamaitai ma tamalii iloga i lana faautaga ma le tofa loloto.

O se tasi o vaega o lona soifua a‘oa‘oina sa auai ai i le Kolisi a Teine Papauta a o lei faamanuiaina i ona faailoga o le tomai faateine tausima‘i pasi ma galue ai lava i le maota gasegase i Ulumotootua a o lei faaipoipo ma tausialii ai i le afioga ia Polataivao Fosi-Schmidt, lē sa avea ma Minisita o Eleele ma isi tofiga taualoa ae na te lei tuua le malo i le tausaga 2005.

E usuia le fono e le tina matua ia Ipu ua 79 tausaga o lona soifua. E to‘a 24 fanau a o laua alo e to‘a 9 ma le afioga ia Polataivao Fosi, e aofia ai ma le afioga i le alii faipule o le Itumalo a Gagaifomauga poo lē foi o loo avea ma Fofoga Fetalai o le Maota Fono o Samoa, le afioga ia Laaulialemalietoa Polataivao Misa Anae Lupematasila Salu Asiata Unasa Iuli Faatafamanogi Timuiaileuateaimatamatanonofo Polataivao Fosi-Schmidt.

Sa faatinoina sauniga faaleaiga o le afioga ia Fuimaono Puletiuatoa Ipu Schmidt i le po o le Aso Faraile na se‘i mavae atu nei i le maota maliu o le auaunaga a le Ligaliga Funeral Services i Magele a o lei molimoli atu lona sa i Samoa i le Aso Sa, aso 16 Tesema, mo lona sauniga faaleaiga i le Aso Tofi nei i le Maota Samoa i Vaitele, lea o loo fuafua e auai atu i ai nisi o sui o le Malo, ma auina atu ai lona tino maliu i le Aso Toonai nei, aso 22 Tesema, mo le lagomauina i le maota malolo o lona aiga i Sagogo, i lona afioaga i Matautu Falelatai.