Na faatumulia le Malumalu o le Ekalesia Katoliko i Mulivai i Apia i le sauniga lotu mulimuli mo le afioga i le faipule o Satupaitea le tofa Asiata Saleimoa Vaai.
O se sauniga mamalu auā sa faatasi ai le sui o le fono a sui tofia le afioga i le tamaaiga Tui Aana Tuimalealiifano Vaaleto‘a Sualauvi II ma lana masiofo o Faamausili Leinafo Tuimalealiifano, o le Faamasino Sili ma nisi o faamasino, le Palemia ma minisita o lana Kapeneta faapea le Sui Fofoga Fetalai o le Palemene ma le mamalu o sui faipule o le Fono Aoao Faitulafono.
O le masina na tea nei na faauuina ai le tofi Tiakono o Asiata i le Ekalesia Katoliko, ma o se tofiga maualuga tele i lea ekalesia, auā e tele ona tiute tauave.
O le molimau lea a se tasi o tamalii sa auai i toe sauniga o le tofa Asiata Saleimoa, ona e pei ua leva ona sauni lea auauna aogā a le ekalesia i lona taimi, auā na tomua i lona faauuga ae mulimuli ane valaau i ai lona matai.
O ia o se tagata e faagalogata i lona uiga, ona o ona uiga i soo se meafai aemaise o le atiina a‘e o le aiga. O se tagata foi sa molimau nisi i lona sauniga faaleaiga, e loto alofa tele.
O le molimau a le alii Palemia, o Asiata o se tagata finau mo mea lelei. O le taimi lava e tulai ai e saunoa i le Palemene, o le taimi foi lea e ki uma ai antenna a le alii Palemia i le fia maua uma o upu e saunoa i ai Asiata, auā o loo momoli mai ai se lesona tāua ma aogā i le Malo. Na molimau foi le alii Palemia i le iai o nisi taimi e feeseeseai o la lagona faaalia ma Asiata i ni faiga faavae a le Malo.
Sa toe faamanatu ai e Tuilaepa i lana molimau le teuteuga a le Malo i le siitia o le pasene o tupe e lē faatagaina e faaaogā e le Malo, sa finauina e Asiata le tatau ona faia se suiga ona e fuafua lava i le fesuiaiga o taimi ma galuega e manaomia ai e le Malo seleni.
Peitai na faaalia e le Palemia e lei malie le finagalo o le sui faipule o Satupaitea i le pasene na siitia i ai tupe lē faatagaina, ma liliu ai loa ma faato‘ai i le faamasinoga sana tagi na fesiligia ai le teuteuina e le Malo o le Faavae, ina ia ogatasi ma le teuteuga o le pasene o tupe lē faatagaina e faaaogā e le Malo e aunoa ma se ioega a le Palemene.
O se ata lea e iloa ai o Asiata o se tagata mataala i mea lelei e pei ona saunoa Tuilaepa i lana molimau.
O Asiata o le uluai faauluuluga lea o le vaega o le Iunivesite Aoao a Samoa o loo a‘oa‘oina Tu ma Aganuu, ae o le masina o Me o le tausaga e 2001 na muta ai lona tofiga, ina ua avea ma sui faipule o le Palemene.
O nisi o ona uso e aofia ai Maiava Iulai Toma, Vaai Mafasolia Papu Vaai, Vaepule Alo Vaemoa Vaai, Malolo Tuifeai Vaai, ma Alaelua Kesi Vaai. O ona tuafāfine e aofia ai Inei Burgess, Aigaga McNeely, Foilagi Masoe, Lumepa Young, Leata Sasagi, ma Manu Schmidt.
E toafā o la alo ma le tina o Sina, e aofia ai Fotuosamoa Marina, Cecilia Salaneta, Julius Vaalepa, ma Jonathan Arona Kolone Vaai.
