E to’a 87 le aofai o alii ma tamaitai faauu i le Iunivesete o le Pasefika i Saute i Alafua o lenei tausaga. Oi latou uma na faauu o tama ma teine o atunuu o le Pasefika o loo aooga i Samoa, aemaise oi latou o loo aooga i Fiti ma isi atunuu ae na faatino a latou faauuga i Samoa.

O le faitau aofai foi lea o loo aofia ai ma le toatolu na faauu i le faailoga o le Masters i tulaga tau aoaoga, ma mataupu faapisinisi.

Peitai na agia i le lipoti a le sui Faaao o le Iunivesete o le Pasefika, Polofesa Rajesh Chandra, o le faitau aofai o le aufaauu sa tatau ona maualuga atu nai lo le faitau aofai lea na faauu i le Aso Faraile na tea nei.

Fai mai Chandra, ua faaleagaina e le afi le ofisa tutotonu o faamaumauga a le Iunivesete i Fiti, ua lē maua ai faamaumauga o togi a isi tamaiti aoga.

“E iai tamaiti e tatau ona auai i le sauniga o le asō, peitai, talu ai ona ua faaleagaina le ofisa tutotonu o faamaumauga, e iai isi tamaiti e tatau ona toe siaki a latou togi o faaiuga o latou suega, ona faatoa faauu ai lea.”

“O le mafuaaga lena e na’o i latou ua faauu i le aso, ae ou te iloa e tatau ona sili atu le aofai o le aufaauu.”

E lē o mautinoa la i le taimi nei, poo aofia ai ma se tama poo se teine Samoa ia i latou o loo toe siaki a latou faaiuga o latou togi o suega. Peitai o le faauuga lava ia, e na’o le toatolu lava tamaiti na faauu i le faailoga tikeri maualuga o le Masters Degree. O le toalua o tamaitai mai Samoa, ma le toatasi o se alii mai Fiti.

O le tamaitai o Victoria Faletutulu mai Fasitoo Uta, na faauu i lona faailoga o le Masters in Education. O se tamaitai faiaoga i se tasi o aoga tulagalua i le atunuu.

O le mau a lea tamaitai, e fia faaaogā pea lona faailoga e a’oa’o ai tamaiti laiti ia, auā a lelei ona faafailele atu i lalo o le lelei foi lea i vasega maualuluga.

O loimata maligi o le fiafia na molimauina, e lē gata i le tamaitai aoga ae faapea ona aiga ma ona mātua. O lona talitonuga, o se aiga ausage lona aiga ae taumafai pea.

O le tamaitai o Sanita Ioapo, o se tamaitai na faiaoga muamua i le vasega faavae a le Iunivese Aoao o Samoa i Lepapaigalagala. O lona faailoga o le Masters Degree i tulaga faapisinisi.

O lana foi lea mau, o le faaosofia o le faalauteleina o lona tomai, ona o lona aiga e lē o se aiga malosi, ae o se aiga e faalaeiauina lava e ona mātua e unaia tulaga tau aoaoga.

O le aotelega o le lipoti a le sui Tapaau o le Iuniveste, ua telē le suiga o le Iunivesete o lenei tausaga. Ua toatele tama ma teine aoga ua fiafia i mataupu tau Faatoaga.

“Ua toatele lenei tausaga i mataupu tau faatoaga pe a faatusa i le tausaga ua mavae ma o se matati’a foi lea, auā o Samoa o le atunuu e faalagolago lona tamaoaiga i tulaga tau faatoaga.”

O le tausaga foi lenei na faalauiloa ai e le sui Tapaau, o lona toe lauga lea i se faauuga a le USP i Alafua, auā ua mae’a lana tautua mo le Iunivesete.

Ma na ia ta’ua foi, o le a ia tuua le Iunivesete ma lona mautinoa, e faaauau pea ona faatupulaia le aofai o tamaiti aoga e lesitala i tausaga oi luma.

Na faafetaia e le Sui Palemia le tautua a lea foi tamalii ua leva tausaga o tautua i le USP i Alafua ma na faaalia le tu faaaloalo a le auvalaaulia i le tutulai lea ma usu le pese ua faafetai, e faaali ai le faafetaia o tausaga e tele a’o galue lea alii i le USP.