Tuuina atu aloaia le ekalesia a Darra Metotisi Samoa a Niu Sila i le faamalu a le Uniting Church a Ausetalia

E tasi le ekalesia i Darra sa i le faamalumaluga a le ekalesia Metotisi a Niu Sila na faatūina ma amataina mai le tausaga e 2008, lea sa faataunuuina ai se sauniga faapitoa i le Aso Sa, aso 4 o Aukuso ma ua ofi atu i le vaavaaiga ma le faamalu a le Ekalesia Soofaatasi a Ausetalia poo le Uniting Church a Ausetalia.
O le susuga ia Vaasili Enosa ma le faletua ia Luaono Masina Logo (Magiagi ma Saasaai) sa galulue ma avea ma taitai o le aulotu Samoa i Darra o le Ekalesia Metotisi a Niu Sila.
O le auga lea na malaga mai ai le afioga i le Sea o le sinoti Samoa o le Ekalesia Metotisi a Niu Sila ia Tovia Aumua (Fagaee i Sasina) ma le faletua ia Leotele (Fogasavaii i Salega) ina ia tuuina atu aloaia le ekalesia a Darra i aao poo o le faamalu o le Ekalesia Soofaatasi a Ausetalia.
E iai taitai o le Ekalesia a le Uniting Church sa faatasi atu i lea sauniga tāua i le aoauli o lea lava Aso Sa.
Saunoa le afioga i le Sea ia Tovia Aumua i luga o le leitio, o le sinoti Metotisi a Niu Sila e 5 vaega, e aofia ai Fiti, Toga, Samoa, Palagi ma Maori.
E tofu a vaega o nei atunuu ma o latou taitai. O le sinoti Samoa o loo taitaia e le Sea ia Tovia Aumua ma o loo faamautu uma  i Niu Sila.
O le aulotu fou sa faatūina i Darra ua faaigoaina nei i le Samoa Metotisi Uniting Church a Ausetalia.