“E sili ona lelei o le toalua i le toatasi…..o le maea foi e sautuatolu, e lē vave motusia…”
O autu ia o manatu na faalaeiau ma apoapoai atu ai le Susuga Pastor Samoa Unoi, le faafeagaiga o le ekalesia Peace Chapel i Vaimea i Samoa, i le faatoafaiava o Solomona Tuigamala faapea foi lana manamea le faatoanofotane o Siagigi Opetaia, i le sauniga na tuufaatasia ai i laua e ala i le sakalameta o le faaipoipoga.
O le aso 26 Ianuari 2014 na faataunuu ai lenei faamoemoe tāua mo Solomona ma Siagigi i le ekalesia Kingdomized Church, Mt Roskill, i Aukilani.
O se aso fiafia ma le matagofie na molimauina e Susuga i faafeagaiga, aiga, uo ma ē masani. O le susuga i le faafeagaiga ia Fale Leilua na saunia le faaipoipoga. O faafeagaiga na auai o Pastor Samoa & Alesi Unoi, Pastor Tuilagi & Tai Leilua, Pastor Elia & Ola Sipaia ma Pastor Peter & Vaonila Leota.
Sa matagofie mea uma ona o le alofa ma le faatasi mai o le Atua. I le faalauteleina o le saunoaga a le faafeagaiga ia Pastor Samoa Unoi, na ia ta‘ua ai, e manaia lava le toalua e pei ona suia mai ai o la olaga tutoatasi na masani ai, a o lea o le a fesoasoani ma fetufaai mea uma.
Peitai, a aunoa ma Iesu Keriso, o le maea sautuatolu e fai ma taiala ma poutu e taula ai lo la aiga fou, o lona uiga e lē mautu ma lē mausali le faavae.
O se afiafi matagofie tele lea afiafi, i le taupati atu o aiga,uo ma aumea mamae a le tama ma le teine faaipoipo e patipatia ma molimauina lo la aso fiafia.
E pei ona ta‘ua na faataunuuina lava le sauniga e le tina ia Fale Leilua. E lē gata o ia o le tina faaleagaga o le fanau sa faaipoipoina, a o ia lava o le faafeagaiga o le ekalesia lea ‘Kingdomized Church’ i Niu Sila.
O Fale ua faaauauina le galuega sa taitaia e le tamā ia Nanai Aperila Leilua ua faiilagi le folauga, ma ua tusi aao foi le ekalesia e tauaveina pea e le tina le galuega seia oo mai i le taimi nei.
O se sauniga matagofie sa matuā faatumulia ai le maota tapuai o le ekalesia, a o tulaga masani lava o aso faapenei, e pei o le laualo lava ma le tamā i le lagi e pei ona masani ai le atunuu.
Na matuā foi le aofia i lea afiafi ma le mama ua lomi ma le vaa ua goto i le matagofie o faaaloaloga faapea le fau ma soloi o le fofoga taumafa na papaaao i ai aiga na lua aemaise foi le Ekalesia a le Kingdomized Church i Aukilani.
Na tauaaoina foi faaaloaloga e pei lava ona masani ai le atunuu i aso faapenei auā le aufaigaluega paia a le Atua ona o pelega lava o mea nei o fanau.
