O le oso a‘e o le la i le taeao o le Aso Toonai, sa avea lea o se faasiliga malosi i le alii o Sefulutasi ma le tamaitai ia Suvania, ina ua maua se aso lagilelei e faataunuuina ai lo la faamoemoe ua leva ona moemiti i ai.
O le aso o le fiafia ua feofoofotai ai le alofa ma fausia ai le mafutaga o se aiga e tasi, faapea foi ona feiloai ai aiga e lua, o le osiga feagaiga i le aiga fou sa faataunuuina lea i le malumalu o le Crossroad Papakura Samoan Methodist Church i Papakura, i le taitaiga a le susuga i le faafeagaiga ia Tavita Palelei.
O le luitau a le susuga i le faafeagaiga mo le ulugalii fou o le mama ua fai lea ma faailoga i le mafutaga ua avea ai i laua o le tino e tasi, e lē mafai foi e se tasi ona faatetea eseina.
O le susuga i le faafeagaiga ia Kuki Aloalii mai le ekalesia o le Livingstone Evangelism Ministry mai Magele sa folafolaina le afioga a le Atua e fai ma taiala o le aiga fou.
Na mae‘a le sauniga sosoo ai ma le taumafataga i le maota o le ekalesia Livingstone. O le ekalesia lava i Magele na tapenaina le taumafataga, a o le susuga ia Namulauulu Tavita sa fai ma fofoga o le aso i aiga na lua, o ia foi sa tu tootoo mo faaaloaloga. Na silia i le toluselau le mamalu o le auvalaaulia sa molimauina le osiga feagaiga o le ulugalii fou.
Na foi le mamalu o le atunuu ma le mama ua lomi ma le vaa ua goto i le matagofie o le aso o le alii ia Sefulutasi ma le tamaitai ia Suvania. Manuia le lua aiga fou, o faamanuiaga mai lua aiga i Samoa, Ausetalia, Amerika ma Niu Sila nei.
